U Navahrudku «Banda na tečykach» abstrelvaje maršrutačnikaŭ FOTA
Haradzienskija maršrutki ŭ treci raz trapili pad abstreł nielehalnych pieravozčykaŭ, jakija nijak nie chočuć puskać kankurentaŭ u Navahrudski i Karelicki rajony.
— Biezzakońnie ŭ hetych rajonach kvitnieje, nielehały vyciaśniajuć usich, kašmarać našych vadzicielaŭ, a siabie hrupoŭka nazyvaje «Bandaj na tečykach», — raspaviadaje AutoGrodno.by pieravozčyk, čyj aŭtamabil abstralali ŭ minuły paniadziełak.
— Pa kirunku Minsk—Navahrudak—Hrodna adpraŭlaje svaje aŭtamabili niekalki lehalnych pieravozčykaŭ. Miascovym ža kiroŭcam, jakija nijak nie zarehistravanyja, takaja situacyja nie padabajecca, — kaža naš surazmoŭca. — Jany pahražajuć kiroŭcam usich lehalnych pieravozčykaŭ i napadajuć na našy aŭtamabili. Pieršaja takaja ataka adbyłasia ŭ listapadzie 2015 hoda. Tady aŭto abstralali ź pnieŭmatyki, raźbili dźvie šyby.
Praź miesiac situacyja paŭtaryłasia. Na hety raz dźvie roznyja maršrutki na chadu zakidali kamianiami, bałtami i hajkami. Ciažkija pradmiety vykidali z sustrečnych aŭtamabilaŭ, adzin z bałtoŭ navat zasieŭ u vietravoj šybie.
— Tady našy kalehi źviartalisia ŭ miascovuju milicyju i pakazvali fota adnaho z tych, chto pahražaje. U Navahrudku ŭ milicyi jaho adrazu paznali, ad nas pryniali zajavu, ale nieŭzabavie spravu zakryli. Vinavatyja tak i zastalisia biespakaranymi, — kaža surazmoŭca.
14 sakavika 2016 hoda na lehalnuju maršrutku znoŭ napali. Na hety raz abstralali hruntoŭna, raźbityja amal usie šyby:
— Mikraaŭtobus byŭ pryparkavany ŭ Kareličach na ahulnaj stajancy, a kiroŭca spaŭ doma. Nieviadomyja ludzi ŭ hadzinu nočy adkryli ahoń pa aŭtamabili ź pnieŭmatyčnaj zbroi. Niezadoŭha da hetaha jany pahražali kiroŭcu, — tłumačyć pradstaŭnik lehalnych pieravozak. — Razumiejecie, tam u ich heta narmalna. Papalić aŭtamabili, pastralać u šyby. Tam navat nie dzievianostyja, tam jašče hłybiej, sapraŭdnaja Sicylija.
— My prasočvajem vyraznuju ŭzajemasuviaź pamiž usimi pahrozami i vyšejzhadanymi vypadkami, — kaža pieravozčyk. — Kalektyŭna my znoŭ źviarnulisia ŭ miascovuju milicyju, padali dastatkovuju kolkaść dokazaŭ viny kankretnych asob. Spadziajomsia, što na hety raz vinavatyja buduć pakaranyja. A my abaviazkova ahučym nastupstvy spravy.