ZŠA vyvieli z-pad sankcyj užo likvidavany ŭ Biełarusi «InterPejBank»
Finansavaja raźviedka ZŠA (FinCEN — padraździaleńnie Minfina ZŠA) vyrašyła vyvieści z-pad sankcyj biełaruski bank InterPay («InterPej»).
Pavodle paviedamleńnia, apublikavanaha va ŭradavym vieśniku Federal Register, jana bolš nie ličyć jaho ustanovaj, jakaja vyklikaje «asablivy niepakoj» z punktu hledžańnia «admyvańnia» srodkaŭ, paviedamlaje TASS.
Jak vynikaje z publikacyi, bank raniej nazyvaŭsia Credexbank. Pad amierykanskija sankcyi jon trapiŭ u mai 2012 hoda.
Havorka idzie pra ZAT «InterPejBank». Jak paviedamlaŭ BiełaPAN, praŭleńnie Nacyjanalnaha banka Biełarusi 8 maja 2015 hoda adklikała ŭ hetaha banka śpiecyjalny dazvoł (licenziju) na ažyćciaŭleńnie bankaŭskaj dziejnaści.
Jak tłumačyli ŭ Nacbanku, takoje rašeńnie było pryniataje ŭ suviazi ź nievykanańniem «InterPejBankam» licenzijnych patrabavańniaŭ da vieličyni narmatyŭnaha kapitału, adsutnaściu vyraznych pierśpiektyŭ pa jaho naroščvańni, nievykanańniem inšych licenzijnych patrabavańniaŭ, ustanoŭlenych Bankaŭskim kodeksam Biełarusi, što «mahło pryvieści da stvareńnia pahrozy intaresam ŭkładčykaŭ i inšych kredytoraŭ banka».
Na toj momant pa pamiery aktyvaŭ «InterPejBank» zajmaŭ 28-je miesca siarod 31 biełaruskaha banka.
U kancy maja pazačarhovym ahulnym schodam ZAT «InterPejBank» było pryniataje rašeńnie ab jaho likvidacyi. Praŭleńnie Nacbanka dało zhodu na likvidacyju banka.
Hety bank byŭ pradstaŭleny na bankaŭskim rynku Biełarusi z 2001 hoda. Pieršapačatkova byŭ zarehistravany ŭ svabodnaj ekanamičnaj zonie «Minsk» jak «Paŭnočny inviestycyjny bank». Z prychodam u bank novaha akcyjaniera ŭ 2007 hodzie adbyłosia źmianieńnie nazvy na ZAT «Kredeksbank». U 2013 hodzie bank źmianiŭ nazvu na ZAT «InterPejBank». Raniej paviedamlałasia, što asnoŭnymi akcyjanierami banka źjaŭlalisia AAT «Aljans Ipateka» (Rasijskaja Fiederacyja) i ZAT «StarBank» (Rasijskaja Fiederacyja).