Alaksiej Doŭbaš raspavioŭ, čamu jon trapiŭ na vočy śpiecsłužbam
Alaksiej Doŭbaš, adzin ź biełarusaŭ, jakoha praviarali na dačynieńnie da terarystyčnaj dziejnaści, raspavioŭ, čamu jon apynuŭsia ŭ pole zroku śpiecsłužbaŭ. Poŭnaja viersija intervju była pakazana ŭ efiry prahramy «Hałoŭny efir» na telekanale «Biełaruś-1» viečaram 27 sakavika.
Pavodle jaho słoŭ, im zacikavilisia pravaachoŭnyja orhany paśla taho, jak jon pabyvaŭ u Turcyi.
«Paśla taho jak pačałasia vajna ŭ Siryi, usich ludziej, jakija traplajuć u Turcyju ź Jeŭropy, za imi ažyćciaŭlajecca hłyboki kantrol. Paśla viartańnia z Turcyi ja zaśviaciŭsia ŭ bazach śpiecsłužbaŭ, moj profil padychodziŭ, voś jany mnie zadali paru pytańniaŭ datyčna taho, dzie ja byŭ, navošta ja tudy pajechaŭ, što ja tam rabiŭ. Usio! Maja sprava była adkryta i adrazu ž zakryta», — rastłumačyŭ jon.
Alaksiej Doŭbaš nie ŭdakładniŭ, śpiecsłužby jakoj krainy cikavilisia jaho znachodžańniem u Turcyi.
Doŭbaš-starejšy taksama raspavioŭ, što byŭ u aeraporcie Zavientem za dzień da dvajnoha vybuchu — źbiraŭsia lacieć u Biełaruś. Jon adznačyŭ, što pajezdka była zapłanavana, kvitki nabytyja, a bielhijskaj palicyi za tydzień paviedamlena pra jaho adjezd.
Adkazvajučy na pytańnie karespandenta, navošta ž jon papiaredžvaŭ palicyju Bielhii ab adjeździe — praviły ž hetaha nie patrabujuć, — Alaksiej Doŭbaš spasłaŭsia na asablivyja abstaviny.
«Mnie treba było papiaredzić ŭ hetym vypadku. U mianie byli takija abstaviny, što treba było papiaredzić. Ja ni na jakim kantroli nie ličusia, prosta mnie treba było papiaredzić. Tamu što ja časta pryjazdžaju siudy, u Biełaruś. I prablema jak by jość, što ja adsutničaju doŭha ŭ krainie, jany mohuć prosta pazbavić mianie adrasu», — paviedamiŭ Doŭbaš.
Małady čałaviek taksama abvierh zajavu KDB Biełarusi, što jeździŭ u Turcyju z metaj pracaŭładkavańnia.
«Na samaj spravie, ja prosta pajechaŭ u Turcyju ŭ adpačynak. Spačatku ja pajechaŭ na dva tydni, ale zvarotny bilet nie braŭ. Mnie tam spadabałasia, ja zastaŭsia, mnie zachaciełasia tam pabyć — u Turcyi ja prabyŭ miesiac», — skazaŭ jon.