«Kamsamolskaja praŭda» adcenzuravała abjavu INP Polščy
Polski Instytut nacyjanalnaj pamiaci zajaviŭ, što rasiejskaje vydańnie «Kamsamolskaja praŭda» adcenzuravała abjavu, jakaja tyčycca Polskaj padpolnaj dziaržavy.
Pavodle paviedamleńnia na sajcie instytuta, INP chacieŭ druhi raz raźmiaścić u «Kamsamolskaj praŭdzie» zvarot da rasiejcaŭ z prośbaj ab pieradačy instytutu infarmacyi, źviazanaj z 16 lidarami Polskaj padpolnaj dziaržavy, jakija byli vykradzienyja NKVD 71 hod tamu.
Pieramovy z vydańniem doŭžylisia niekalki tydniaŭ. Na minułym tydni INP apłaciŭ abjavu. Napiaredadni vychadu numara ŭ tyraž akazałasia, što hałoŭny redaktar źmianiŭ źmiest abjavy. U suviazi z hetym instytut skasavaŭ publikacyju tekstu.
Z tekstu abjavy źnikli niekalki skazaŭ, naprykład, pra toje, što lidary Polskaj padpolnaj dziaržavy na praciahu niekalkich hadoŭ byli źviazanyja z antyfašysckim padpollem. Taksama byŭ vykraśleny skaz pra toje, što palaki pryniali zaprašeńnie na Jałcinskuju kanfierencyju i paźniej byli pieraviezienyja ŭ Maskvu. «U červieni 1945 hoda ŭ Maskvie pačaŭsia pakazalny praces, jaki tyčycca ich suviaziaŭ z Trecim rejcham», — napisaŭ instytut u čarhovym frahmiencie, vykraślenym redaktaram «Kamsamołki».
U liście ŭ redakcyju rasiejskaha vydańnia namieśnik kiraŭnika INP Pavieł Ukielski adznačyŭ, što pa pryčynie dadzienych źmienaŭ artykuł nie tłumačyć, kim byli lidary Polskaj padpolnaj dziaržavy, jak jany byli aryštavanyja NKVD i za što byli asudžanyja ŭ Maskvie savieckim sudom.
Pradstaŭniki lehalnych polskich uładaŭ, jakija pryznajucca zachodnimi dziaržavami, byli pryviezienyja ŭ Maskvu ŭ červieni 1945 hoda i asudžanyja na pakazalnym pracesie. Ich abvinavacili ŭ supracoŭnictvie ź niamieckimi fašystami i baraćbie suprać SSSR i prysudzili da roznych terminaŭ. Niekatoryja z asudžanych nie dažyli da zakančeńnia terminu źniavoleńnia.