Zatrymanaja karelickaja «banda na tečykach» — pieravozčyki, jakija zabajalisia kankurencyi i rasstralali aŭtobus
Zatrymali mužčyn, jakija abstralali maršrutku ŭ Kareličach. Zdareńnie adbyłosia ŭnačy 10 sakavika. Mikraaŭtobus byŭ rasstralany ź pnieŭmatyčnaha pistaleta, u im było raźbitaje škło ŭ voknach.
Jak infarmuje pres-słužba UUS Hrodzienskaha abłvykankama, vyśvietliłasia, što napad učynili mužčyny, jakija majuć lehalny biźnies u śfiery pieravozak pasažyraŭ z Karelič i Navahrudka ŭ Minsk. U pačatku sakavika jany zaŭvažyli ŭ horadzie mikraaŭtobus ź minskimi łahatypami i paličyli, što heta ich kankurent. Ale pamylilisia. Kiroŭca hetaj maršrutki vaziŭ pasažyraŭ z Hrodna ŭ Kareličy, ale jaho mikraaŭtobus złamaŭsia, tamu jon jeździŭ na inšym, jaki atrymaŭ ad svajoj firmy (jon byŭ źniaty z rejsa Minsk — Hrodna).
Pa kryminalnaj spravie prachodziać 37-hadovy žychar Navahrudka i 34-hadovy žychar Biarozaŭki Lidskaha rajona. Ich zatrymali ŭ Kareličach pry siłavoj padtrymcy bajcoŭ AMAPu — milicyjaniery nie vyklučali aktyŭnaha supraciŭleńnia.