«Amkador» prynios sienataru Šakucinu miljony dalaraŭ strataŭ
Čystaja strata najbujniejšaha pryvatnaha mašynabudaŭničaha chołdynhu Biełarusi «Amkador», uładalnikam jakoha źjaŭlajecca sienatar Alaksandr Šakucin, u minułym hodzie vyrasła bolš čym u dva razy.
Pra heta śviedčać dadzienyja apublikavanaj spravazdačy ab prybytkach i stratach pradpryjemstva ŭ 2015 hodzie.
Vyručka AAT «Amkador — kirujučaja kampanija chołdynhu» skaraciłasia bolš čym na 20% (z 1 089 870 młn rubloŭ da 891 107 młn rubloŭ), a čystyja straty vyraśli ŭ 2,28 raza — da 217 369 młn rubloŭ, ci amal da 11 młn dalaraŭ.
Uładalnikam kantrolnaha pakieta chołdynhu z kanca 2012 hoda źjaŭlajecca kampanija «Interservis». Jaje ŭłaśnikami ŭ svaju čarhu nazyvajucca adzin z samych upłyvovych biznesoŭcaŭ Biełarusi, člen Savieta Respubliki Nacyjanalnaha schodu Biełarusi i staršynia Biełaruskaj tenisnaj fiederacyi Alaksandr Šakucin i jaho navapołacki partnior Mikałaj Vierabiej. Taksama z 2002 hoda ŭ akcyjaniery chołdynhu ŭvachodziać niepalskija inviestary, čyje intaresy ŭ nahladalnaj radzie pradstaŭlaje Niradž Šrestcha. 7,07% akcyj AAT «Amkador — kirujučaja kampanija chołdynhu» naležać dziaržavie.
Z čystaj strataj minuły hod skončyli i niekalki daččynych pradpryjemstvaŭ, što ŭvachodziać u skład chołdynhu.
Čystaja strata, pavodle spravazdač za 2015 hod, amal u try razy vyrasła na AAT «Amkador-Biełvar» (32 389 młn rubloŭ). AAT «Amkador-Dziaržynsk» pa vynikach 2014 hoda było prybytkovym, ale ŭ minułym hodzie čystaja strata kampanii skłała 5 361 miljonaŭ rubloŭ. U «čysty» minus spracavała i AAT «Amkador-Unimod» (5 648 młn rubloŭ).
Stratnyja i niekatoryja inšyja pradpryjemstvy sienatara. Naprykład, čystaja strata kampanii «Saleja-Homiel», jakaja ŭvachodzić u kantralavany biznesmienam chołdynh «Saleja», skłaŭ pa vynikach 2015 hoda 33 346 młn rubloŭ.
Jak pisali biełaruskija ŚMI, u sakaviku na pradpryjemstvie chołdynhu «Saleja» pabyvaŭ kiraŭnik Kamiteta dziaržaŭnaha kantrolu Leanid Anfimaŭ. Jon sustreŭsia z pracoŭnym kalektyvam.
«Imklivaje raźvićcio TAA «Saleja» raźbivaje pierakanańni złaśliŭcaŭ i piesimistaŭ pra toje, što ekanomika znachodzicca ŭ kryzisie», — zajaviŭ tady kiraŭnik KDK.