Dla biełarusaŭ patańnieŭ roŭminh u krainach JEAES
Mabilnyja apieratary Biełarusi, Rasii, Armienii, Kazachstana i Kyrhyzstana damovilisia ab tym, kab źnizić ceny na suviaź u roŭminhu pamiž krainami. Pra heta paviedamlaje sajt Jeŭrazijskaj ekanamičnaj kamisii.
Źnižeńniem koštaŭ na roŭminh u krainach Jeŭrazijskaj ekanamičnaj sajuza na praciahu niekalkich miesiacaŭ zajmajucca antymanapolnyja viedamstvy piaci krain. Na naradzie 14 krasavika jaho ŭdzielniki raspaviali, jak mienavita źnizilisia ceny za apošni čas.
U jakaści prykładu pryviali ceny ZAT «BieST» — mabilnaha apieratara life:). Hałasavyja pasłuhi patańnieli da 4 razoŭ — z 26 455 biełaruskich rubloŭ za chvilinu da 6 173 (vierahodna, havorka idzie pra siaredniuju canu chviliny na ŭvachodnyja i vychodnyja vykliki).
Raniej pra źnižeńnie koštaŭ u roŭminhu paviedamlaŭ mabilny apieratar MTS. Pa niekatorych kirunkach źnižeńnie skłała da 84%.
Ekanamičny efiekt dla spažyŭcoŭ dziaržaŭ JEAES ad źnižeńnia koštu pasłuh suviazi ŭ roŭminhu na terytoryi JEAES moža skłaści da 2 miljardaŭ rasijskich rubloŭ (kala 30 miljonaŭ dalaraŭ) u hod.
Udzielniki schodu pryniali rašeńnie praciahnuć pracu ŭ hetaj śfiery. U tym liku płanujecca stvaryć umovy dla čarhovaha źnižeńnia koštu pasłuh hałasavoj suviazi ŭ roŭminhu ŭ 2017 hodzie.
Raniej stała viadoma pra płany ŭstanavić maksimalnyja taryfy dla vychodnych hałasavych vyklikaŭ u roŭminhu. Dla 2016 maksimum ustanoŭleny na 0,68 jeŭra, u 2017-m — 0,3 jeŭra za chvilinu.