Raźmierkavańnie na žurfaku: A Brahin — heta Minskaja vobłaść?
U Instytucie žurnalistyki mała zajavak na vypusknikoŭ. Pra heta adrazu kažuć studenty, jakija taŭkucca pierad dźviaryma, dzie zasiadaje kamisija pa raźmierkavańni. Uznačalvaje kamisiju ministr infarmacyi Lilija Ananič.
«Nie bolš za 15 zajavak, dakładna», — kažuć dziaŭčaty, jakich sustrakaju ŭ kalidory. Usie čakajuć, što zadavolać zajaŭki ad pryvatnikaŭ. I na pačatku ich sapraŭdy zadavalniajuć. Navat dajuć volnyja dypłomy:
«Kažuć, što sioleta niama zajavak ź Minska, u asnoŭnym — z rajonnych haziet. Mnie daviałosia prasić volny dypłom, bo moj muž ź Minska i jon tut vučycca. I biez prablem dali», — apisvaje svajo raźmierkavańnie Maryna.
Pakul z kabinieta vychodziać viasiołyja maładyja śpiecyjalisty, prablem niama. Pa zajaŭcy adpuskajuć navat u «Kamsamolskuju praŭdu ŭ Biełarusi».
Šancuje i vypusknikam śpiecyjalnaści «Aŭdyjovizualnaja žurnalistyka», ich adpuskajuć u pryvatnyja firmy i navat inžynieram u svoj ža Instytut žurnalistyki.
«Budu adpracoŭvać inžynieram, adkazvać na pytańni pa mantažy videa i aŭdyjo, budu aktavy zał adčyniać», — razvažaje pra budučuju pasadu Uład.
Dachodzić da «Vieb-žurnalistyki» i tut pačynajucca prablemy. U kalidory zaŭvažaju dziaŭčynu ŭ ślazach. Zajaŭku nie zadavolili i raźmierkavali ŭ Buda-Kašalova z čyrvonym dypłomam.
Jaje kaleha Hanna atrymoŭvaje raźmierkavańnie ŭ… Brahin! Chacia sama ź Minska.
«A Brahin — heta Minskaja vobłaść?» — pytajecca jana ŭ siabrovak. I pačynaje huhlić, dzie toj Brahin znachodzicca.
«Abiacali 1,2 miljona akład i internat. Budu pieraraźmiarkoŭvacca, ale jak, pakul nie viedaju», — Hanna daviedałasia dzie ž znachodzicca Brahin.
Sioleta budučych žurnalistaŭ adpraŭlali na pracu bieź śloz. A karespandentu Jeŭraradyjo navat nie prapanavali ažanicca, jak letaś.
U redakcyi haziety «Majak Paleśsia», kudy raźmierkavali maładych śpiecyjalistaŭ, ich čakajuć kožny hod. A jany nie dajazdžajuć!
«Kožny hod adpraŭlajem zajaŭki. Ale z BDU nichto nie dajazdžaje. U hetym hodzie dźvie adpraŭlali. Moža, niechta pryjedzie», — skardziacca ŭ redakcyi.
Jašče niekalki vypusknikoŭ adpraŭlajucca pa ich ułasnych zajaŭkach.