Udzielniki hrupy, jakija raspaŭsiudžvali spajsy ŭ Minsku, asudžanyja na doŭhija terminy
U sudzie Pieršamajskaha rajona Minska 3 maja abvieščanyja prysudy ŭ dačynieńni da ŭdzielnikaŭ złačynnaj hrupy raspaŭsiudžvalnikaŭ spajsaŭ.
Fota BiełTA
U śniežni 2015 hoda Śledčy kamitet zajaviŭ, što ŭ Minsku praduchilenaja dziejnaść złačynnaj hrupoŭki pa raspaŭsiudžvańni psichatropnych rečyvaŭ. Pravaachoŭnikam udałosia spynić pracu troch internet-mahazinaŭ pa prodažy zabaronienych rečyvaŭ, siarod jakich byŭ bujny mahazin OrigLegal.
Byli zatrymanyja 14 čałaviek ad 18 da 25 hadoŭ, u tym liku dziaŭčyna 1991 hoda naradžeńnia, u jakoj jość dzicia. Zatrymanym vystavili abvinavačańnie ŭ vyrabie, raspaŭsiudžvańni i pieravozcy narkatyčnych i psichatropnych rečyvaŭ (čč. 3, 4 st. 328 KK).
U vyniku da 10 hadoŭ pazbaŭleńnia voli pryhavoranyja Pavieł Palitanski, Anastasija Bułyhina i Alaksandr Pilec.
Da 12 hadoŭ źniavoleńnia sud pryhavaryŭ Kiryła Buhajova, Andreja Sulžyca, Dzianisa Saŭčanku, Mikitu Franckieviča, Jaŭhiena Słabko, Mikałaja Piatroviča i Jaŭhiena Parfionava.
Na 13 hadoŭ pazbaŭleńnia voli asudžanyja Alaksandr Hryšanovič, na 14 hadoŭ — Kirył Apanovič i Rusłan Alijeŭ.
Samaje surovaje pakarańnie — 15 hadoŭ pazbaŭleńnia voli — atrymaŭ Alaksiej Kazłoŭski.
Sud taksama pastanaviŭ kanfiskavać majomaść abvinavačanych, u tym liku hrašovyja srodki i aŭtamabili Mazda, Peugeot 307, Toyota RAV4.
Prysud pakul nie ŭvajšoŭ u zakonnuju siłu. Advakaty i svajaki bolšaści abvinavačanych zajavili pra namier padać apielacyju