U Minsku źjaviłasia «aleja šlachty»
Aleja šlachty zakładzienaja na terytoryi Łošyckaha siadzibna-parkavaha kompleksu ŭ Minsku. Pra heta paviedamiŭ staršynia HA «Minski schod naščadkaŭ šlachty i dvaranstva» Ihar Čakałaŭ-Šydłoŭski.
Hramadskaje abjadnańnie vystupiła inicyjataram i vykanaŭcam prajekta, jaho aŭtaram — hałoŭny architektar prajektaŭ majsterni łandšaftnaj architektury RUP «Minskprajekt» Hanna Aksionava.
Pa słovach Ihara Čakałava-Šydłoŭskaha, kancepcyja alei budzie realizavanaja paetapna. U Łošyckim kompleksie siabry Minskaha schodu naščadkaŭ šlachty i dvaranstva pry ŭdziele duchavienstva i pry sadziejničańni UP «Minskzielenbud» vysadzili 17 rabin (simvalizujuć piaščotu i addanaść dam) i 3 duby (siła i mahutnaść rycaraŭ). Rabiny pasadžanyja viankom, u centry — try duby. «U płanach — druhi vianok, darožki, ustanoŭka pamiatnaha kamienia», — skazaŭ surazmoŭca.
Aleja zakładzienaja ŭ pamiać pra pradstaŭnikoŭ šlachieckich rodaŭ, jakija addali svaje žyćci ŭ vialikich bitvach. «Naša arhanizacyja stvoranaja ludźmi, jakija cikaviacca histaryčnaj spadčynaj krainy, jaje hieraičnym minułym. Luboŭ da Baćkaŭščyny, pavaha da kultury i cikavaść da historyi — voś hałoŭnyja pastułaty, jakimi kirujecca ŭ svajoj dziejnaści naš schod», — dadaŭ Ihar Čakałaŭ-Šydłoŭski.
Jak paviedamlaje Radyjo Svaboda, da idei alei šlachty sa ździŭleńniem pastaviŭsia kancler Zhurtavańnia biełaruskaj šlachty, jon ža maršałak Minski, Alaksandr Šymbaloŭ:
«Ja nie viedaju, što heta takoje, aleja šlachty, i navošta jana patrebnaja. U dziaržavie, jakaja represavała šlachtu i da hetaha času šalmuje ŭsiakuju ideju šlachty… Pačytajcie histaryčnyja padručniki, pačytajcie navukovyja pracy, jakija ciapier vychodziać — da hetaha času ŭsie, źviazanaje sa šlachtaj i arystakratyjaj, heta varožaje, heta vychodzić za ideałohiju dziaržavy».
Šymbaloŭ kaža, što Zhurtavańnie i samo nie supracoŭničaje sa Schodam, i inšym nie rekamienduje: maŭlaŭ, heta «kamiercyjny prajekt», jaki «vydaje za hrošy dypłomy, kali proźvišča suhučnaje šlachieckamu» i «da šlachty nie maje dačynieńnia». Samo ž Zhurtavańnie navat nie sprabavała prapanoŭvać inicyjatyvy, padobnyja da alei šlachty:
«Nie było takich prapanoŭ, nikoli my da dziaržavy nie źviartalisia. Zhurtavańnie biełaruskaj šlachty zajmajecca radavodami spravami, navukovymi, histaryčnymi. Papulizmam my nie zajmajemsia».