U Dziarždumie RF admovilisia zabaraniać biznes svajakam parłamientaryjaŭ
Kamitet Dziarždumy RF pa kanstytucyjnym zakanadaŭstvie i dziaržaŭnym budaŭnictvie daŭ admoŭny vodhuk na prapanovu zabaranić zajmacca biznesam svajakam kiraŭnikoŭ abiedźviuch pałat rasijskaha parłamienta.
«Realizacyja prapanavanych normaŭ akramia dyfierencyravanaha padychodu da samich parłamientaryjaŭ paciahnie abmiežavańnie pravoŭ asoby na svabodnaje vykarystańnie svaich zdolnaściej i majomaści dla pradprymalnickaj ci inšaj nie zabaronienaj zakonam ekanamičnaj dziejnaści», - cytuje TASS člena kamiteta Rustama Išmuchamietava.
Pavodle jaho słoŭ, urad Rasii zakonaprajekt taksama nie padtrymaŭ, u suviazi z čym zakonaprajekt prapanavana adchilić.
Dakumient, zaklikany pa zadumie aŭtaraŭ praduchilić kanflikt intaresaŭ, byŭ uniesieny na razhlad deputatam ad KPRF Vadzimam Sałaŭjovym.
Dakumient mierkavaŭ uviadzieńnie zabarony na kamiercyjnuju dziejnaść dla svajakoŭ deputataŭ Dziarždumy i členaŭ Savieta Fiederacyi ŭ vypadkach, kali «zamiaščajecca pasada Staršyni pałaty, namieśnika Staršyni pałaty, a taksama staršyni kamiteta abo kamisii».
Razam z tym u tłumačalnaj zapiscy da zakonaprajekta havorycca pra ŭsich deputataŭ Dziarždumy i členaŭ Savieta Fiederacyi, a nie tolki pra kiraŭnikoŭ pałat i kamitetaŭ.
«Vidavočna, što člen Savieta Fiederacyi, deputat Dziaržaŭnaj Dumy nie zmoža abjektyŭna i spraviadliva vykonvać svaje słužbovyja abaviazki (ažyćciaŭlać paŭnamoctvy) u vypadku blizkaha svajactva (baćki, muž i žonka, dzieci, braty, siostry, a taksama braty, siostry, baćki, dzieci muža i žonki i mužy dziaciej) z asobaj, jakija ŭdzielničajuć u dziejnaści pa kiravańni haspadarčym tavarystvam ci inšaj kamiercyjnaj arhanizacyjaj, a taksama ažyćciaŭlajuć pradprymalnickuju dziejnaść», — pisaŭ Sałaŭjoŭ.
Zakonaprajekt deputata-kamunista nie sustreŭ padtrymki ŭ profilnym dumskim kamitecie. Jašče da jaho razhladu kiraŭnik kamiteta Uładzimir Plihin zajaviŭ, što ŭ źmienach, prapanavanych Sałaŭjovym, niama nieabchodnaści, bo, pa jaho słovach, «u zakanadaŭstvie dastatkova poŭna ŭrehulavana pytańnie kanfliktu intaresaŭ».