Zatrymany kiroŭca, jaki źbiŭ naśmierć dźviuch studentak u Minsku, zaviedziena kryminalnaja sprava
Upraŭleńnie Śledčaha kamiteta pa Minsku ŭstanaŭlivaje akaličnaści darožna-transpartnaha zdareńnia, u vyniku jakoha zahinuli dźvie dziaŭčyny, paviedamiła BiełaPAN aficyjny pradstaŭnik SK Biełarusi Julija Hančarova.
Pavodle apošniaj infarmacyi śledčych orhanaŭ, kala 20 hadzin 12 maja 50-hadovy vadziciel lehkavoha aŭtamabila «Sitraen», ruchajučysia pa vulicy Mahiloŭskaj u stalicy, učyniŭ najezd na dvuch piešachodaŭ, jakija znachodzilisia na tratuary.
U vyniku darožna-transpartnaha zdareńnia adna z paciarpiełych, 1996 hoda naradžeńnia, atrymaŭšy cialesnyja paškodžańni, nie sumiaščalnyja z žyćciom, zahinuła na miescy. Druhaja, 1995 hoda naradžeńnia, była apieratyŭna dastaŭlena va ŭstanovu achovy zdaroŭja, dzie pamierła ad atrymanych traŭm. Abiedźvie dziaŭčyny — studentki Biełaruskaha dziaržaŭnaha technałahičnaha ŭniviersiteta.
Śledča-apieratyŭnaj hrupaj USK pa Minsku praviedzieny ahlad miesca zdareńnia z udziełam śpiecyjalistaŭ Dziaržaŭnaha kamiteta sudovych ekśpiertyz i DAI HUUS Minharvykankama.
USK pa Minsku raspačata sprava pa č. 3 art. 317 KK (parušeńnie praviłaŭ darožnaha ruchu, što paciahnuła pa nieaściarožnaści śmierć dźviuch asob). Vadziciel zatrymany.
Śledčyja dapytvajuć śviedak, ustanaŭlivajucca vidavočcy trahiedyi, pryznačany kompleksnyja sudova-miedycynskija, aŭtatechničnyja i trasałahičnyja ekśpiertyzy. Praviarajucca ŭsie mahčymyja viersii zdareńnia.