U piensijanierki Niny Bahinskaj kanfiskavali majomaść — za akcyi sa ściahami
Ź mienskaj kvatery 69-hadovaj aktyvistki Niny Bahinskaj sudovyja vykanaŭcy kanfiskavali mikrachvaloŭku i pralnuju mašynu ŭ lik štrafaŭ za akcyi i nakłali aryšt na dačnyja ŭčastki. Pra heta paviedamlaje sajt «Biełaruski dakumentacyjny centar».
Nina Bahinskaja — udzielnica mnohich vuličnych akcyjaŭ, kudy jana niaźmienna prychodzić ź bieł-čyrvona-biełym ściaham.
Jak raskazała spadarynia Nina, sudam jana vinnaja ŭžo bolš za 40 miljonaŭ:
«Štrafaŭ za ŭdzieł u akcyjach u mianie ŭžo nabiehła na 40 miljonaŭ, na sudovyja pasiedžańni ja ŭžo nie chadžu — nia baču sensu, navošta marnavać čas? Pieršy raz sudovyja vykanaŭcy pryjšli ŭ maju adsutnaść. Doma byŭ syn. Jany praviali vopis majomaści. Ja napisała zajavu ŭ sud, što ja nia zhodnaja, bo heta nie maja majomaść, a maich dziaciej. U adkaz atrymała zvyčajnuju adpisku, na ich dumku — usio zakonna. Praz tydzień pryjšli zabirać apisanaje: dvoje ŭ cyvilnym i dvoje ŭ formie sudovych vykanaŭcaŭ. U kvateru ja ich nie puskała, vyklikała milicyju. Sudovyja vykanaŭcy ŭsio zdymali na videakameru. Pryjechaŭ narad milicyi, ja im paviedamiła, što mianie chočuć abrabavać. Na jakoj heta padstavie hetyja ludzi chočuć zabrać rečy, jakija navat mnie nie naležać? Dziaržava represuje mianie, dyk z majoj pensii i vyličvajecca! Pry čym tut maje dzieci, unuki i praŭnuki?»
U minułuju piatnicu, 20 traŭnia, Nina Bahinskaja pryjechała ź lecišča ŭ svaju mienskuju kvateru. Syn paviedamiŭ joj, što prychodzili sudovyja vykanaŭcy i zabrali pralnuju mašynku i mikrachvalevuju pieč.
«Ale jak ža tak? Heta ŭsio naležała maim dzieciam, unukam, praŭnukam. Unučka ciapier rukami myje adziežu dla majho siamimiesiačnaha praŭnuka. Jany ŭ čym vinavatyja? Paźniej ja atrymała list pra toje, što i na maje dačnyja ŭčastki nakładzieny aryšt — u Damašanach i Marjinaj horcy. Ja rychtuju pratest u prakuraturu».
Tym časam Nina Bahinskaja atrymała čarhovuju sudovuju pozvu — za ŭdzieł u akcyi «Praspekt nacyjanalnaha ściahu» jaje pavinny sudzić adrazu pa dvuch pratakołach.