Saŭčanka: Ja hatovaja stać prezidentam Ukrainy
Narodny deputat Ukrainy Nadzieja Saŭčanka zajaviła, što kali ŭkraincy chočuć, to jana hatovaja stać prezidentam.
president.gov.ua
Pra heta jana skazała ŭ piatnicu na pres-kanfierencyi, adkazvajučy na pytańni.
«Ukraincy, kali vam treba, kab ja była prezidentam, to ja budu prezidentam», — zajaviła Saŭčanka.
Jana adznačyła, što choča lotać, adnak hatovaja stać prezidentam. «Ja, ščyra kažučy, nie skažu, što ja chaču. Ja lublu lotać. Ale kali treba, to ja zrablu ŭsio, ja prajdu i hety šlach», — skazała Nadzieja Saŭčanka.
Pry hetym jana padkreśliła, što heta nie pytańnie zaŭtrašniaha dnia.
«Ja zaŭtra na Bankovuju [rezidencyja prezidenta Ukrainy] jašče nie źbirajusia. I kali stanu prezidentam, ale Majdan skaža, što ja tam nie patrebna, ja nie budu čaplacca za prezidencki fatel», — skazała jana. Zaraz, jak deputat Viarchoŭnaj Rady, jana maje namier zajmacca vyzvaleńniem inšych ukrainskich vajskoŭcaŭ, jakija trapili ŭ pałon, a taksama pytańniami armii.
«Budu zajmacca ŭ kamitetach pa kantroli za armijaj. Ja viedaju, jak tam na pieradavoj, i ja viedaju ŭsiu karupcyju ŭ vojsku. Ja budu zmahacca z hetym», — adznačyła jana.
«Ja chaču miru, i kampramisy mahčymyja… Ale nie canoj zdrady — heta naša ziamla. Ale kali tam hatovyja iści na pieramovy, my taksama hatovy», — skazała jana.
Pry hetym padziei na ŭschodzie Ukrainy Saŭčanka nazvała rasijska-ŭkrainskaj vajnoj.
«Heta nie hramadzianskaja vajna, heta rasijska-ŭkrainskaja vajna. Niejkaja častka ich naroda pryjechała vajavać na našu ziamlu.
Vorah — Rasija», — padkreśliła jana.
Taksama jana skazała, što «chacieła b pabačyć śviet i zrabić turne pa krainach, jakija akazali b dapamohu Ukrainie ŭ baraćbie z ahresaram».
Jak viarnuć Krym
Na pytańnie, jak Ukraina moža viarnuć anieksavany Rasijaj Krym, Saŭčanka adkazała, što, na jaje dumku, dla hetaha jość dva varyjanty: vajna abo mižnarodnaje prava.
«Treba było tady iści i abaraniać. My heta vypuścili … Jak zaraz viartać? Kali budzie Treciaja suśvietnaja, Krym vierniecca. Biez vajny — mižnarodnym pravam treba dastukacca da ludziej. Moža być, heta adbudziecca praz pakaleńni», — skazała jana.