Makiej: Dakumient pa libieralizacyi vizavaha režymu dla zamiežnikaŭ budzie hatovy ŭ najbližejšyja miesiacy
U najbližejšy čas budzie padrychtavany dakumient ab libieralizacyi vizavaha režymu ŭ Biełarusi dla zamiežnych hramadzian. Pra heta 27 maja ŭ Minsku paviedamiŭ žurnalistam ministr zamiežnych spraŭ Uładzimir Makiej.
«Što tyčycca prapanavanaj libieralizacyi vizavaha režymu, to raboty ŭ hetym kirunku viaducca. Zaraz z zacikaŭlenymi viedamstvami, jakija adkazvajuć u tym liku i za biaśpieku, uzhadniajucca pytańni, jakija mohuć paŭpłyvać na, skažam tak, ustojlivaść našaha hramadstva. Heta pytańni, jakija źviazany i z pahrozami teraryzmu. Ciapier usie hetyja pytańni vyrašajucca, i, ja dumaju, na praciahu dvuch miesiacaŭ my vyjdziem užo na dakumient, na ŭkaz», — skazaŭ Makiej.
Na pytańnie ab pieramovach pa ŭvachodžańni Biełarusi ŭ SHA jon adkazaŭ: «U hetym u pieršuju čarhu zacikaŭleny našy biźnies-struktury. Zaraz my pracujem nad realizacyjaj kankretnych zachadaŭ pa ŭvachodžańni ŭ Suśvietnuju handlovuju arhanizacyju. Idzie zvyčajnaja rucinnaja praca. My zaraz zrabili šerah unutranych pracedur, unutranych arhanizacyjnych mier, źviazanych z našym uvachodžańniem u SHA. U pryvatnaści, pryznačany adkaznyja za tyja ci inšyja napramki, u MZS vydzielena dadatkovaja kolkaść ludziej, jakija pracujuć u hetym kirunku. Ja dumaju, što pieramovy ŭ značnaj stupieni aktyvizujucca».