Ciońnia startuje letniaja sieryja kancertaŭ «Zaśpiavaj 3.0»
Žury nazvała šaściorki finalistaŭ u kožnaj z troch naminacyjaŭ konkursu. Hetyja vykanaŭcy vystupiać užyvuju ŭ letniaj sieryi kancertaŭ i majuć šaniec atrymać hrašovy pryz da 1500 jeŭra.
Usiaho na konkurs, jaki pravodziać partał Tuzin.fm i dabračynny fond «Viartańnie» pryjšło 78 zajavaŭ. Ź ich žury adabrała 18 najlepšych u troch naminacyjach — «Śpiavanaja paezija», «Biełaruski kavier» i «Zamiežny pierakład». Pavodle ŭmovaŭ sioletniaha konkursu razhladalisia zajavy ad kankursantaŭ ad 16 da 33 hadoŭ uklučna. «Pa-mojmu, nie aby-jaki kantakt muzyki z paezijaj adbyŭsia, – zaznačaje siabra žury Andrej Chadanovič. – Kali tak pojdzie i dalej, našyja muzyki pačnuć aryjentavacca ŭ sučasnaj biełaruskaj paezii nie horš ad samich paetaŭ». U lik najlepšych piesień konkursu ŭvajšli tvory na słovy Uładzimira Karatkieviča, Źmitra Višniova, Iryny Bahdanovič, Nasty Kudasavaj, Ihara Kananoviča, Barysa Žančaka. Najbolš udałymi kavierami pryznanyja pieraśpievy piesień hurtoŭ «Bonda», «Mroja», N.R.M., prajektu «Narodny albom», «Bieź bileta», «Siabroŭ», a z zamiežnych – biełaruskamoŭnyja pieraasensavańni piesień Pita Sihiera, Eryka Kłeptana, Erasa Ramazoci, Queen, HaBanot Nechama, «Kipiełov».
Pieśni ŭsich finalistaŭ konkursu možna pasłuchać tut.
Finalisty konkursu voźmuć udzieł u letniaj sieryi kancertaŭ «Zaśpiavaj 3.0», jakija projduć u červieni-žniŭni ŭ samym centry Minsku, u dvoryku na płoščy Svabody, 4 (terasa kaviarni Chill Out) pry padtrymcy viadomych biełaruskich muzykaŭ. U pieršym kancercie z haściavym setam najlepšych piesień vystupić Palina Respublika i finalisty konkursu – hurt «Tutejšyja», DW dy tryjo Dzimy Nikanoviča, Volhi Saciuk i Mikity Najdzionava. Vieści kancerty «Zaśpiavaj 3.0» budzie Aleh Chamienka.
10.06. Minsk, Chill Out (płošča Svabody, 4, unutrany dvoryk). 19.00-22.00. Zaśpiavaj 3.0: Tutejšyja, DW, Nikanovič&Saciuk&Najdzionaŭ.Hość – Palina Respublika. Košt kvitkoŭ: 100 000 rub. (papiarednie), 150 000 rub. (u dzień, pry najaŭnaści). Infa: +375 29 687-20-93.