Słucki pojas pradajuć u minskim aeraporcie bolš za 4 tysiač jeŭra
U sacsietkach źjaviłasia fatahrafija słuckaha pojasa za 4 154,6 jeŭra, jaki pradajecca ŭ djuci-fry minskaha aeraporta. FINANCE.TUT.BY vyśviatliŭ, čym abumoŭlena cana takoha biełaruskaha suvienira koštam u 13 siarednich zarobkaŭ.
Rabotniki samoha djuci-fry rastłumačyć taki ceńnik nie zmahli: «Treba telefanavać vytvorcu, daviedvacca, jaki materyjał, jakaja vytvorčaść. My mahazin — my prosta pradajem».
Vytvorca, RUP «Słuckija pajasy», nazyvaje pojas «siarebranym»: «Materyjał — 100% naturalny šoŭk z ukrapinami srebnaj nitki», — tłumačyć supracoŭnica adździeła zabieśpiačeńnia i zbytu Hanna.
Na samim pradpryjemstvie taki słucki pojas kaštuje kala 2500 dalaraŭ (2 200 jeŭra), to bok krama pradaje pojas amal u dva razy daražej.
Na pradpryjemstvie raskazvajuć, što ŭsie pajasy ŭ ich robiać z naturalnaha šoŭku — adsiul i vysokija ceny. Samyja tannyja pajasy, kali kuplać na fabrycy, kaštujuć ad 20 miljonaŭ rubloŭ, samy darahi — kala 3500 dalaraŭ.
U djuci-fry kažuć, što popytu na suvienir pa takoj canie niama. U asnoŭnym, turysty addajuć pieravahu nievialikim frahmientam słuckich pajasoŭ u ramcy. Košt takoha pano značna mienš - 205 jeŭra, jak ukazana na sajcie kramy.