Asudžanych u Rasii Sałošanku i Afanaśjeva abmianiali na adeskich sieparatystaŭ
Ukraincaŭ Hienadzia Afanaśjeva i Juryja Sałošanku, jakija byli asudžanyja rasijskim sudom, abmianiali na adeskich arhanizataraŭ i ŭdzielnikaŭ tak zvanaj «Narodnaj rady Biesarabii» Alenu Hliščynskuju i Vitala Dzidzienku.
facebook.com/svyatoslav.tsegolko
Pra heta piša adeskaje vydańnie «Dumskaja» sa spasyłkaj na svaje krynicy.
«Hliščynskuju i Dzidzienku abvinavačvajuć u sieparatyźmie — jany byli ŭ liku arhanizataraŭ i aktyŭnych udzielnikaŭ tak zvanaj «Narodnaj rady Biesarabii», — piša vydańnie.
«U sakaviku-krasaviku byli praviedzienyja aryšty, siarod zatrymanych byli žurnalisty Arciom Buziła, Vital Dzidzienka i Alena Hliščynskaja. Paśla Buziła byŭ prysudžany da čatyroch hadoŭ abmiežavańnia voli, praz hod vyjšaŭ na volu pa «zakonie Saŭčanka» i adrazu ž pakinuŭ Ukrainu. Hliščynskaja i Dzidzienka adpraviacca ŭ Rasiju siońnia», — adznačajecca ŭ paviedamleńni.
Dyrektara telekampanii «Novaja chvala» Alenu Hliščynskuju aryštavali supracoŭniki SBU ŭ krasaviku 2015 hoda. Paŭtara miesiaca tamu ŭ SIZA ŭ jaje naradziŭsia syn. Akramia taho, u jaje jość jašče dvoje niepaŭnaletnich dziaciej.
Dzidzienka — hałoŭny redaktar partału «Infacentr». Sud prysudziŭ jaho da troch hadoŭ abmiežavańnia voli, ciapier sprava znachodzicca ŭ apielacyi.
Jak paviedamiŭ «Ukrinfarm», samalot z Afanaśjevym i Sałošankam užo pryziamliŭsia ŭ aeraporcie «Baryspal». Abodva niezakonna asudžanyja ŭkraincy buduć sustrakacca z prezidentam Ukrainy Piatrom Parašenkam.
Jak piša RIAN, samalot avijakampanii DMK «Rasija» dastaviŭ Hliščynskuju i Dzidzienku ŭ Maskvu. Jak paviedamili ŭ administracyi prezidenta RF, pasiarednikam pry ich vyzvaleńni staŭ člen padhrupy pa humanitarnych pytańniach u trochbakovaj kantaktnaj hrupie, kum prezidenta RF Pucina Viktar Miedviadčuk.