Delehatka ad BRSM z Babrujska: Nie pahadzicca z prezidentam nielha pa vyznačeńni
Na Ŭsiebiełaruski narodny schod z usioj Biełarusi sabrali dźvie z pałovaj tysiačy kandydataŭ. Ad kožnaj vobłaści byŭ arhanizavany transpart ŭ Miensk. U Miensku ŭsie žyvuć u roznych hatelach — chto ŭ «Planecie», chto ŭ «Biełarusi». Na hetych ža aŭtobusach arhanizavana padvieźli da Pałaca Respubliki.
— A praŭda, što vam jak delehatu planšet padaryli? — pytajemsia ŭ delehata ź Miensku.
— Praŭda.
— «Samsunh?»
— Zdajecca, tak.
— A pakažycie.
— A ja jaho nia braŭ.
Jak mienavita vyłučali delehataŭ, uciamna nichto nie adkazaŭ — «horad vyłučyŭ», «vykankam vyłučyŭ», «raz nas vybrali, značyć, zasłužyli». Maładych delehataŭ u asnoŭnym prasoŭvali «pa linii BRSM».
Hałoŭny redaktar hazety «Sovietskaja Biełoruśsija» Pavał Jakubovič i śpiavačka Iryna Darafiejeva
Viera Šyrokaja z Babrujsku — pieršy sakratar Babrujskaha haradzkoha kamitetu BRSM. Na schodzie jana razam sa svajoj «vyłučenkaj», sakratarom BRSM u handlova-ekanamičnym kaledžy Valancinaj Šadziejkinaj. Arhanizacyjaj dziaŭčaty zadavolenyja: «usie na vyšejšym uzroŭni», «usie pa raskładzie». Viera kaža, što schod musić stać «impulsam dla raźvićcia dziaržavy», a vystupam Alaksandra Łukašenki jana ŭražanaja:
«Nie pahadzicca z prezydentam nielha pa vyznačeńni. Budziem kazać adekvatna. Usio, što jon kaža, «prietierpievajet opyt» (tak u aryhinale), projdzieny našaj krainaj za hetyja piać hod. I prablemy, jakija my čuli, asabliva ŭ sfery adukacyi, usio refarmujuć-refarmujuć, a našyja školniki pakutujuć. Sfera ŽKH — usio nijak my nia možam udziešavić našy taryfy, vyjści na rentabelnaść. Usie aspekty, zakranutyja kiraŭnikom dziaržavy — abjektyŭnyja. Pytańnie ŭ inšym: nakolki my zmožam za budučuju piacihodku realizavać zadačy, pastaŭlenyja našym prezydentam».
Viera Šyrokaja i Valancina Šadziejkina
— Za papiaredniuju piacihodku nia nadta atrymałasia.
— My zakładniki hieapalityčnaj sytuacyi i abstavinaŭ. Ekanamičny kryzys, jaki zakranuŭ i Rasieju, i Eŭropu, prajšoŭsia pa nas, možna skazać husienicami ad tanka. My zakładniki, nia možam abstrahavacca ad źniešniaha ŭździejańnia, — paryruje pieršy sakratar Babrujskaha BRSM.
Viktoryja Boŭtrel z Navahradzkaha koledža pra svoj udzieł u schodzie kaža badziora: «Jak vypusknicu mianie buduć cikavić pytańni realizacyi moładzievaj palityki, chaciełasia b pačuć pra novyja pracoŭnyja miescy dla maładych specyjalistaŭ, pra raźmierkavańnie maładych specyjalistaŭ, mnie budzie cikava pasłuchać pra vynik sacyjalna-ekanamičnaha raźvićcia za pieršuju piacihodku.
«Dla nas heta vialikaja padzieja, samaja prykmietnaja za ŭsio žyćcio!» — kažuć dźvie delehatki z Haradzienščyny. Ad Haradzienskaj vobłaści tut 350 delehataŭ.
Nastaŭnicy z Haradzienskaj vobłaści, jakija tolki što pamiž saboj ździŭlalisia, što ŭ Miensku «pa 500 tysiač płociać u cyrulni» na pytańnie: «Jak vam arhanizacyja?» — kažuć «kamsamolskimi hałasami»:
«Dziakuj i prezydentu, i ŭsiamu ŭradu, što arhanizacyja na takim uzroŭni. My ŭsio pieradamo našamu narodu, raspaviadziem. Mnie, jak pedahohu, pryjemna, što było šmat uvahi adukacyi. I ŭsio było tak skazana, jak my ŭ žyćci sutykajemsia. Takoje adčuvańnie, što Alaksandr Ryhoravič u nas u škole pabyvaŭ, usio pabačyŭ. Uvieś vystup i honar vyklikaŭ, dzie my dasiahnuli niejkich pakaźnikaŭ. I sum, kali nie ŭdałosia niešta vykanać. Kaniečnie, nie ŭdałosia vykanać, što źviazana z našymi susiedziami, z Ukrainaj, Rasiejaj. Pra ŭsio heta było skazana».
Z vyłučeńniem u delehaty viarchoŭnaha mufcija Abu-Bekira Šabanoviča ŭsio bolš zrazumieła, jon tut pradstaŭlaje musulmanskuju supolnaść.
«Ja ŭvažliva pasłuchaŭ i natatki zrabiŭ, — kaža spadar Šabanovič. — Liču, što dakład maštabny i achoplivaje ŭsie sfery žyćcia dziaržavy i hramadztva. U mianie supiarečnaściaŭ niama. Tolki pažadańnie, kab hetyja arhumentavanyja razmovy stali realnymi dziejańniami. Prezydent pravilna skazaŭ, što niekalki razumnych ludziej dajuć dobryja idei, ale vykonvać ich treba ŭsim astatnim u struktury dziaržaŭnaj ułady».
Suveniry
Michaił Miłavanaŭ z Muzeju historyi horada Miensku pierakanany, što ŭsie našyja prablemy ad taho, što my «mała pracujem»:
«Dla mianie samaje hałoŭnaje — pracavać zakasaŭšy rukavy. I nie patrabavać ničoha. Usie mała pracujuć. Jak pracavaŭ biez vychodnych, tak ja budu i dalej dziejničać. Nas možna paraŭnać z Paŭdniovaj Karejaj, kvitniejučaj u technalahičnym planie krainaj. Ale ani ŭ Paŭdniovaj Karei, ani ŭ Biełarusi niama karysnych vykapniaŭ. Jak skazaŭ prezydent siońnia: «Niama — šukajcie». Tam jość tolki ludzi. U nas jość tolki my sami. Kali budziem pracavać u miežach toj prahramy, jakaja budzie tut pryniataja, to nam ničoha nie pahražaje. Mnie zdajecca, što my zvyklisia patrabavać. A ja rekamendavaŭ by zadumacca pra toje, što nia nam pavinnyja, a my pavinnyja», — kaža jon.
Uładzimir Haściuchin
Aktor Uładzimier Haściuchin u razmovie z žurnalistami mocna škadavaŭ pra «vialikaje savieckaje kino». A što da schodu, to jon salidarny ź inšymi delehatami:
«Zachavałasia stabilnaść, prynamsi. Pra ŭsie prablemy prezydent dakłaŭ — što nie atrymałasia, što mierkavałasia. Spadziajusia, što ŭ nastupnaj piacihodcy ŭsio heta budzie dasiahnuta», — kaža aktor.
Siońnia delehaty pracavali na schodzie da 18 hadziny. Paśla ich raźvieźli pa hatelach na viačeru, a da 20.30 arhanizavana dastaviać u Pałac sportu na «kancert majstroŭ mastactva».