Źmicier Daškievič: Padtrymać palitviaźnia — heta padtrymać Chrysta (pryśviečana Eduardu Palčysu)
Mnohija pakaleńni ludziej i ŭ mnohich narodach zmahalisia za praŭdu, piša Źmicier Daškievič na sajcie Maładoha Frontu.
Niekatorym udałosia dačakacca pieramožnych vynikaŭ svajoj samaachviarnaści, ale bolšaść, na žal, pieramohi Praŭdy ubačyć nie mahła.
Paŭstaje pytańnie: a dla čaho tady jany ŭvohule išli suprać chłuśni i ŭzurpataraŭ? Išli, biezumoŭna, dziela inšych ludziej i nastupnych pakaleńniaŭ. Ale heta nia ŭsio. Sam Isus Chrystos śviedčyć, što zmahary za praŭdu majuć samuju vialikuju ŭznaharodu hetaha śvietu – Vaładarstva Niabiosnaje.
U Nahornaj kazańni Jon havoryć:
«Dabraščasnyja hnanyja za praŭdu, bo ich jość Vaładarstva Niabiosnaje» (Pavodle Maćvieja 5:10).
I voś tut paŭstaje pytańnie ŭžo da nas: jak my padtrymoŭvajem tych, chto znachodzicca na samym piarednim froncie baraćby za praŭdu – na vajnie, na barykadach ci ŭ viaźnicy? U našych umovach havorka pakul što pra tych, chto niespraviadliva ŭviaźnieny, chto za praŭdu pazbaŭleny svabody.
Padtrymka kožnaha, chto cierpić za praŭdu ad uładumajučych – adzin z častych napaminaŭ Biblii.
Apostał Pavał piša: «Pamiatajcie viaźniaŭ, jak by i vy ź imi byli ŭ kajdanach, i pakutnikaŭ, bo i sami vy ŭ ciele» (Da Habrejaŭ 13:3).
U inšym miescy Chrystos havoryć takuju prypavieść:
«Kali ž pryjdzie Syn Čałaviečy ŭ słavie Svajoj i ŭsie śviatyja anioły ź Im, tady siadzie na tronie słavy Svajoj, i źbiarucca pierad Im usie narody; i adździelić adnych ad druhich, jak pastuch adździalaje aviečak ad kazłoŭ; i pastavić aviečak pravaruč ad Siabie, a kazłoŭ — levaruč.
Tady skaža Car tym, jakija pravaruč ad Jaho:«Pryjdziecie, dabrasłavionyja Ajca Majho, prymiecie ŭ spadčynu Carstva, uhatavanaje vam ad stvareńnia śvietu: bo byŭ hałodny Ja, i vy dali Mnie jeści; byŭ saśmiahły, i vy napaili Mianie; byŭ padarožny, i vy pryniali Mianie; byŭ hoły, i vy adzieli Mianie; byŭ chvory, i vy adviedali Mianie; u ciamnicy byŭ, i vy pryjšli da Mianie».
Tady praviedniki skažuć Jamu ŭ adkaz: «Hospadzie! kali my bačyli Ciabie hałodnaha i nakarmili? albo saśmiahłaha i napaili? kali ž my bačyli Ciabie padarožnaha i pryniali? albo hołaha i adzieli? kali ž my bačyli Ciabie chvoraha, albo ŭ ciamnicy, i pryjšli da ciabie?»
I Car skaža im u adkaz: «Praŭdu kažu vam: jak što zrabili vy heta adnamu z bratoŭ Maich mienšych, dyk zrabili Mnie».
Tady skaža i tym, jakija levaruč ad Jaho: «Idziecie ad Mianie, praklatyja, u vahoń viečny, uhatavany djabłu i aniołam jahonym: bo byŭ hałodny Ja, vy nie dali Mnie jeści; byŭ saśmiahły, i vy nie napaili Mianie; byŭ padarožny, i nie pryniali Mianie; byŭ hoły, i nie adzieli Mianie; chvory i ŭ ciamnicy, i nie adviedali Mianie»
Tady i jany skažuć jamu ŭ adkaz: «Hospadzie, kali my bačyli Ciabie hałodnaha, albo saśmiahłaha, albo padarožnaha, albo hołaha, albo chvoraha, albo ŭ ciamnicy, i nie pasłužyli Tabie?»
Tady skaža im u adkaz: «Praŭdu kažu vam: jak što vy nie zrabili hetaha adnamu z hetych mienšych, dyk nie zrabili Mnie».
I pojduć hetyja na pakuty viečnyja, a praviedniki ŭ žyćcio viečnaje» (Pavodle Maćvieja 25:31-46).
Davajcie nia budziem abyjakavymi naziralnikami, davajcie padtrymoŭvać hnanych za praŭdu – palitviaźniaŭ. Tym bolš, kab prajavić svaju padtrymku pakul što nia treba i asablivaj achviarnaści – dastatkova prosta ŭziać asadku ŭ ruki dy napisać palitviaźniu ciopłyja słovy salidarnaści. Siońnia, u śviatočny niadzielny dzień, dašlicie paštoŭku Edurdu Palčysu, inšym palitviaźniam. Chto viedaje, moža hetym samym my dapamahajem nia tolki aryštantu, ale i Samomu Chrystu?
Adresa dla listavańnia: 222160, Minskaja vobł., h. Žodzina, vuł. Savieckaja, 22A, turma №8. Palčysu Eduardu Alaksandraviču