Histaryčnaja pieramoha: Isłandyja vyšybaje ź Jeŭra Anhliju – 2:1
Kali isłandcy trapili na Jeŭra-2016 z mocnaj hrupy, dzie hulali hałandcy, turki, čechi, to ŭžo tady mnohija padumali, što heta skačok vyšej hałavy, i dalej hordym vikinham ničoha nie śviecić.
Na samim Jeŭra ŭ hrupie z Partuhalijaj, Aŭstryjaj i Vienhryjaj, Isłandyja nie prajhrała nivodnaha matča. Jak vynik, traplańnie ŭ 1/8 finała na «viečnych niaŭdačnikaŭ» – zbornuju Anhlii.
Matč dla pradstaŭnikoŭ Tumannaha Albijona pačaŭsia lepiej nie prydumaješ. Słavieniec Skamina pryznačyŭ pienalci za foł Chałdarsana. Runi nie pramazaŭ – 1:0.
Taki pačatak moža nadłamić i samyja mocnyja kamandy śvietu. Tolki nie isłandcaŭ. Užo praź dźvie chviliny ličby na tabło byli roŭnymi. Heta futbalist rasijskaha «Krasnadara» Rahnar Sihurdsan, centralny abaronca, u chakiejnym styli zamknuŭ vydatnuju pieradaču svajho partniora – 1:1.
Na 18-aj chvilinie Isłandyja ŭvohule vyjšła napierad. Heta Kalbiein Sihtarsan skarystaŭsia pamyłkaj anhlijskaha bramnika Džo Charta — 2:1.
Paśla hetaha anhličanie byli absalutna padaŭlenyja. Jany tak i nie zmahli stvaryć ničoha vartaha ŭ druhim tajmie. Nie zmoh vyratavać anhličan i čaraŭnik Vardzi, jaki zrabiŭ «Lester» čempijonam Premjer-lihi.
Anhličanie i ich fanaty znoŭ zastajucca ni z čym. Adzinaja pieramoha anhličan na top-spabornictvach datujecca 50-hadovaj daŭninoj.
Isłandyja ž prosta prymušaje zakachacca ŭ hetuju kamandu. Chłopcy z dalokaha paŭnočnaha vostrava ŭsio jašče bjucca za pieramohu na Jeŭra, tady jak mnohija favaryty ŭžo doma.
U čverćfinale Isłandyja 3 lipienia zhulaje z Francyjaj.