Na źjeździe ŁDP vyłučana 110 kandydataŭ u deputaty
Na 16-m (pazačarhovym) źjeździe Libieralna-demakratyčnaj partyi 16 lipienia ŭ Minsku ad partyi vyłučana 110 kandydataŭ u deputaty — pa adnym na kožnaj z vybarčych akruh, paviedamili ŭ pres-słužbie ŁDP.
Źjezd, pryśviečany vyłučeńniu kandydataŭ, prachodziŭ u zakrytym dla presy režymie. Jak patłumačyŭ na pres-kanfierencyi 9 lipienia pieršy namieśnik staršyni partyi Aleh Hajdukievič, źviazana heta z tym, što źjezd nosić techničny charaktar z hałasavańniem pa kožnaj kandydatury.
Na źjeździe taksama zaćvierdžany adziny tekst vystupleńnia kandydataŭ ad arhanizacyi pa telebačańni i radyjo ŭ pieryjad ahitacyjnaj kampanii i pieradvybarnaja prahrama «Za Mocnuju Biełaruś!».
Zhodna z prahramaj, ŁDP na parłamienckich vybarach budzie vystupać za niezaležnaść i suvierenitet krainy, niedapuščeńnie skažeńnia ci pierapisvańnia historyi ad Połackaha kniastva da Respubliki Biełaruś, padtrymku biełaruskaj movy i kultury, rehijanalnaje raźvićcio i pašyreńnie paŭnamoctvaŭ miascovych orhanaŭ ułady.
U źniešniepalityčnym błoku prahramy padkreślivajecca, što parłamienckaja aktyŭnaść pavinna ŭzmacnić rolu krainy na mižnarodnaj arenie, šmatviektarnaść nie pavinna iści ŭ razrez z nacyjanalnymi intaresami. «ŁDPB upeŭniena zajaŭlaje, što lepšaj formuły vybudoŭvańnia mižnarodnaj palityki, čym: Zachad — naš Partnior, a Rasija —parłamiencki Sajuźnik, pakul niama i ŭ ahladnaj budučyni nie pradbačycca», — adznačajecca ŭ prahramie.
Partyja taksama vystupaje za stvareńnie «mahutnaha infarmacyjna-prapahandysckaha resursu, jaki pavinien na ŭsich papularnych zamiežnych movach danosić suśvietnaj hramadskaści pazicyju našaj krainy, łabiravać našy intaresy i stvarać pazityŭny vobraz, dapamahajučy zamiežnikam pieraadoleć naviazanyja stereatypy».