Tramp hatovy abaraniać ad Rasii nie ŭsie krainy NATA
Respublikanski kandydat u prezidenty ZŠA Donald Tramp paabiacaŭ u vypadku abrańnia ŭ pieršuju čarhu kłapacicca pra ZŠA, zajaviŭšy, što kraina pavinna spačatku «navieści paradak u siabie», pierš čym sprabavać źmianić pavodziny inšych krain.
Pra heta jon skazaŭ u intervju haziecie New York Times.
«Nie dumaju, što ŭ nas jość prava zajmacca maralami. Pahladzicie, što adbyvajecca ŭ nas u krainie. Jak my možam zajmacca maralizatarstvam, kali ludzi spakojna zabivajuć palicyjantaŭ?»
«My ŭ pieršuju čarhu budziem kłapacicca pra našu krainu, pierš čym turbavacca ab inšych u śviecie», — skazaŭ jon.
Zhodna z New York Times, Tramp zajaviŭ, što jon prymusić sajuźnikaŭ uziać na siabie vydatki na abaronu, jakija ZŠA nieśli na praciahu dziesiacihodździaŭ, admovicca ad šmathadovych damovaŭ, jakija jon ličyć niavyhadnymi, i pierahledzieć samo paniaćcie partniora Złučanych Štataŭ.
Jon taksama sumniavajecca, što, budučy prezidentam, jon aŭtamatyčna praciahnie harantyi biaśpieki, dziakujučy jakim 28 členaŭ NATA ŭpeŭnienyja, što ich padtrymaje ŭsia vajennaja moc ZŠA.
U pryvatnaści, adkazvajučy na pytańnie ab pahroźlivych dziejańniach Rasii, jakija vyklikajuć tryvohu ŭ nievialikich krain Bałtyi, maładych siabroŭ NATA, Tramp skazaŭ, što kali Rasija napadzie na ich, to rašeńnie ab tym, prychodzić im na dapamohu, jon budzie prymać tolki paśla pravierki, ci vykonvali hetyja krainy «svaje abaviazacielstvy pierad nami».