Staršynia Pałaty pradstaŭnikoŭ aficyjna zarablaje u 5 razoŭ bolš za siaredniaha biełarusa
ci zasłužanaja heta ŭznaharoda?
U haziecie «Vieśnik Hłyboččyny» apublikavanyja dekłaracyi ab dachodach kandydataŭ pa Dokšyckaj akruzie №22. Siarod ich — dziejny staršynia pałaty pradstaŭnikoŭ Uładzimir Andrejčanka.
Za minuły hod jaho dachod skłaŭ 413 424 565 niedeminavanych rubloŭ. Heta 34 452 047 štomiesiac.
Takim čynam, pa tahačasnym kursie siaredniamiesiačny dachod Uładzimira Andrejčanki skłaŭ $2172.
Pry hetym siaredni zarobak u krainie za hod skłaŭ 6 716 333 rubloŭ ($423). U piać razoŭ mienš, čym u Andrejčanki.
Adznačym, što staršynia pałaty pradstaŭnikoŭ inflacyju i devalvacyju nie adčuvaje ŭžo daŭno. U 2007, jašče ŭ statusie viciebskaha hubiernatara, jon u siarednim mieŭ pa $2100 za miesiac. A ŭ 2011 Andrejčanka-śpikier zadekłaravaŭ štomiesiačnyja $2250.
Što jość va ŭłasnaści śpikiera parłamienta?
1. Trochpakajovyja apartamienty płoščaj 114 m2 u domie pa vulicy Pijanierskaj u Drazdach. Adznačym, što hetaja elitnaja kvatera była dziŭnym čynam pryvatyzavanaja ŭ 2010 hodzie.
2. Ziamielny nadzieł na vulicy Vierbnaj u Viaśnincy («Drazdy-2). Katedž na im Andrejčanka pakul jašče tolki buduje.
3. U jakaści lecišča deputat vykarystoŭvaje dom u vioscy Padbiareźzie Viciebskaha rajona.
4. Taksama ŭ Andrejčanki va ŭłasnaści zastaŭsia haraž u Viciebsku.
* * *
Uładzimir Andrejčanka naradziŭsia ŭ 1949 u vioscy Marjanava Loźnienskaha rajona. Skončyŭ Łužaśnianski sielhastechnikum (1968), Vielikałucki sielskahaspadarčy instytut (1977), Minskuju vyšejšuju partyjnuju škołu (1988). Paśla słužby ŭ vojsku pracavaŭ ahranomam. U 1972—1975 — instruktar u Loźnienskim rajkamie kamsamoła, a paśla ŭ rajkamie KPB. U 1975—1978 — sakratar partkama saŭhasa «Adamienka», u 1978—1981 — staršynia kałhasa imia Danukałava Loźnienskaha rajona. U 1981—1985 — načalnik upraŭleńnia sielskaj haspadarki Loźnienskaha rajvykankama, u 1985—1987 — staršynia rajvykankama. U 1987—1991 hadach — staršynia Vierchniadźvinskaha rajsavieta, pieršy sakratar Vierchniadźvinskaha rajkama KPB. U 1991—1994 — namieśnik staršyni Viciebskaha abłvykankama pa sielskaj haspadarcy, u 1994—2008 — staršynia Viciebskaha abłvykankama. Z 2008 — staršynia pałaty pradstaŭnikoŭ.