Rasijskija śpiecsłužby nie ŭpuścili ŭ Biełaruś paŭtysiačy rabinaŭ
Kalektyŭnaja malitva rabinaŭ Jeŭropy, jakaja pavinna była siońnia prajści ŭ Lozna Viciebskaj vobłaści, akazałasia pad pahrozaj. 500 iudziejskich śviataroŭ nie zmahli ŭjechać u Biełaruś.
Kanhres rabinaŭ Jeŭropy prachodzić z 18 pa 26 žniŭnia ŭ Maskvie. 22 žniŭnia 500 rabinaŭ z 30 krain Jeŭropy vyjechali sa Smalenska ŭ Lozna dla ŭdziełu ŭ kalektyŭnaj malitvie i naviedvańnia miemaryjała «Adamienskaja horka» ŭ biełaruskim rajcentry. Adnak zajechać u Biełaruś jany nie zmahli: na miažy jany byli spynienyja supracoŭnikami pamiežnaj słužby FSB Rasii pa Smalenskaj vobłaści.
«Pakolki bolšaść členaŭ delehacyi źjaŭlajecca zamiežnikami — heta značyć, nie biełarusami i rasijanami, — na ich nie raspaŭsiudžvajecca dziejańnie pałažeńniaŭ ab pierasiačeńni miažy hramadzianami Sajuznaj dziaržavy. Adpaviedna, trapić z Rasii ŭ Biełaruś jany mohuć tolki praź mižnarodnyja punkty propusku», — ličać u rasijskich śpiecsłužbach.
«Akramia taho, u bolšaści delehataŭ niama biełaruskaj vizy. Kali b jany prybyvali ŭ Biełaruś praź mižnarodnyja punkty propusku abo, naprykład, prylacieli ŭ Nacyjanalny aeraport «Minsk», jany mahli b atrymać dazvoł na ŭjezd u krainu. A na rasiejska-biełaruskaj miažy takich punktaŭ vydačy vizy niama», — dapoŭniŭ TUT.BY pradstaŭnik pres-słužby Dziaržaŭnaha pamiežnaha kamiteta Biełarusi Anton Byčkoŭski.
A tym časam u Lozna čakajuć vialikuju delehacyju. Čakaje delehacyju i prezident Biełarusi, jaki nakiravaŭ pryvitańnie delehatam Kanhresu rabinaŭ Jeŭropy.
«Naša dziaržava i hramadstva, vałodajučy bahatymi duchoŭnymi tradycyjami i kaštoŭnaściami, addanyja pryncypam talerantnaści i adkrytaści da dyjałohu. My nabyli ŭnikalny dośvied zachavańnia i padtrymańnia mižkanfiesijnaha miru i zhody, jakim pa pravie hanarymsia», — havorycca ŭ pryvitańni.
Alaksandr Łukašenka taksama padkreśliŭ, što Biełaruś źjaŭlajecca ŭtulnym domam, u im siabie kamfortna adčuvajuć ludzi roznych nacyjanalnaściaŭ i vieravyznańniaŭ. Jon taksama adznačyŭ, što siońnia iudaizm zajmaje hodnaje miesca siarod roznych kanfiesij respubliki, a mierapryjemstvy, jakija ładziacca iudziejskimi relihijnymi arhanizacyjami ŭ Biełarusi, sacyjalnyja, dabračynnyja, kulturnyja, važnyja i značnyja dla hramadstva.