Delehacyju rabinaŭ usio-taki puścili ŭ Biełaruś, i jany dabralisia da Lozna
Delehacyja iudziejskich śviataroŭ zmahła dabracca ŭviečary 22 žniŭnia da biełaruskaha horada Lozna (Viciebskaja vobłaść). U rajcentr prybyli prykładna 500 rabinaŭ z 30 krain Jeŭropy.
Situacyja vyrašyłasia stanoŭča: paśla pravierki dakumientaŭ na miažy delehataŭ puścili ŭ krainu, i jany nakiravalisia ŭ rajcentr u supravadžeńni DAI, pieradaje «Radyjo Svaboda».
Raniej supracoŭniki pahraničnaha ŭpraŭleńnia FSB Rasii pa Smalenskaj vobłaści nie prapuścili ŭ Biełaruś delehacyju. Śviatary biaruć udzieł u kanhresie rabinaŭ Jeŭropy, jaki prachodzić u Maskvie 18—24 žniŭnia. Jany naviedvajuć miescy, źviazanyja z pamiaćciu ab zahinułych jaŭrejaŭ. Adno ź ich — biełaruski rajcentr Lozna.
U delehacyi šmat hramadzian trecich dziaržaŭ, jakija nie ŭvachodziać u Sajuznuju dziaržavu Rasii i Biełarusi. U suviazi z tym, što takija hramadzianie pavinny pierasiakać dziaržaŭnuju miažu ŭ mižnarodnych punktach propusku, ich nie prapuścili z Rasii. Akramia taho, u mnohich členaŭ delehacyi nie było biełaruskich viz.
Adnak situacyja ŭ vyniku vyrašyłasia. Pavodle infarmacyi BiełTA, u Loźnie rabinaŭ sustreŭ upaŭnavažany pa spravach relihij i nacyjanalnaściaŭ Leanid Hulaka. Iudziejskija śviatary naviedali miemaryjał «Adamienskaja horka», dzie pamalilisia ab jaŭrejach, jakija zahinuli ŭ hady Druhoj suśvietnaj vajny. U lutym 1942 hoda tut adbyŭsia adzin z samych masavych rasstrełaŭ mirnych žycharoŭ — było zabita prykładna 1,5 tysiačy čałaviek, siarod jakich svajaki viadomaha ŭ śviecie mastaka Marka Šahała.
Nahadajem, što siońnia ranicaj Alaksandr Łukašenka nakiravaŭ pryvitańnie delehatam kanhresa rabinaŭ Jeŭropy. U im adznačałasia, što biełaruskaja dziaržava i hramadstva, «vałodajučy bahatymi duchoŭnymi tradycyjami i kaštoŭnaściami, addanyja pryncypam talerantnaści i adkrytaści da dyjałohu». «My nabyli ŭnikalny vopyt zachavańnia i padtrymańnia mižkanfiesijnaha miru i zhody, jakim pa pravie hanarymsia», — skazana ŭ pryvitańni. Kiraŭnik dziaržavy taksama padkreśliŭ značnaść roli jaŭrejskaha naroda ŭ historyi Biełarusi.