Kabielnyja apieratary atrymali papiaredžańnie Mininfarma, bo tranślavali kanały nie ŭ toj paśladoŭnaści, jak treba
Ministerstva infarmacyi Biełarusi vyniesła papiaredžańni raspaŭsiudnikam pradukcyi televizijnych srodkaŭ masavaj infarmacyi ab niedapuščalnaści parušeńniaŭ zakanadaŭstva ab ŚMI, aŭtarskim pravie i sumiežnych pravach. Takaja infarmacyja raźmieščanaja na sajcie viedamstva.
Adznačajecca, što Ministerstvam infarmacyi ŭ žniŭni praviedzienyja čarhovyja manitorynhi dziejnaści apierataraŭ elektrasuviazi Viciebskaj i Hrodzienskaj abłaściej. Pa vynikach vyjaŭlenyja parušeńni zakanadaŭstva ab ŚMI, aŭtarskim pravie i sumiežnych pravach. U pryvatnaści, heta nievykanańnie šeraham apierataraŭ elektrasuviazi paśladoŭnaści (čarhovaści) tranślacyi teleprahram, jakija ŭvachodziać u abaviazkovy ahulnadastupny pakiet (zaćvierdžany pastanovaj Saŭmina №407 ad 13 maja 2015 hoda); ažyćciaŭleńnie tranślacyi zamiežnych teleprahram, jakija nie atrymali dazvoł na raspaŭsiud na terytoryi Biełarusi; niepaviedamleńnie Ministerstvu infarmacyi ab pačatku (spynieńni) raspaŭsiudžvańnia teleprahram.
U suviazi z hetym vyniesienyja piśmovyja papiaredžańni apierataram elektrasuviazi AAT «Viciebski abłasny technahandlovy centr «Harant», TDA «Pieradavyja technałohii», TAA «Firma Dyjapazon», TAA «Rost», TAA «Varta», TDA «Iŭjeŭskaje kabielnaje telebačańnie».
«Ministerstva infarmacyi źviartaje ŭvahu ŭsich raspaŭsiudžvalnikaŭ pradukcyi televizijnych srodkaŭ masavaj infarmacyi na nieabchodnaść niaŭchilnaha vykanańnia dziejučaha zakanadaŭstva ab ŚMI, a taksama zakanadaŭstva ab aŭtarskich i sumiežnych pravach», — adznačyli ŭ viedamstvie.
Paŭtornaje vyjaŭleńnie padobnych pravaparušeńniaŭ paciahnie za saboj administracyjnuju adkaznaść abo vyklučeńnie apierataraŭ elektrasuviazi, jakija dapuścili parušeńni, ź Dziaržaŭnaha rejestra raspaŭsiudžvalnikaŭ pradukcyi televizijnych i radyjoviaščalnych srodkaŭ masavaj infarmacyi.