Arhanizatary «Listapada» terminova šukajuć sponsaraŭ: kinafiestyval pad pahrozaj zryvu
Dyrekcyja Minskaha mižnarodnaha kinafiestyvalu «Listapad» źviedvaje surjoznyja finansavyja ciažkaści i ŭ terminovym paradku šukaje sponsaraŭ, paviedamiła kiraŭnik Centra vizualnych i vykanalnickich mastactvaŭ «ART Karparejšn» i dyrektar kinafiestyvalu Anžalika Krašeŭskaja.
Pavodle jaje słoŭ, kab zabiaśpiečyć paŭnavartasnuju arhanizacyju čarhovaha, 23-ha, kinafiestyvalu, nie chapaje 300 tysiač rubloŭ (kala 150 tysiač dołaraŭ). Krašeŭskaja nie ŭpeŭnienaja, ci zmoža fiestyval adbycca sioleta navat va ŭrezanym farmacie ŭ tym vypadku, kali dyrekcyja nie znojdzie nieabchodnuju sumu hrošaj.
Ciažkaści ź finansavańniem kinafiestyvalu ŭźnikajuć ledź nie štohod, padkreśliła kiraŭnik «ART Karparejšn». Adnak u minułyja hady dyrekcyi zaŭsiody ŭdavałasia adšukać nieabchodnyja 60% pazabiudžetnych srodkaŭ dla praviadzieńnia «Listapada», astatnija 40% biudžetu vydzialali zasnavalniki hetaha kinaforumu — Ministerstva kultury i Minharvykankam.
«Akramia taho, nam kožny hod dapamahali: chtości spansavaŭ dastaŭku haściej, chtości — prakat kinastužak. Kali b nie hetaja dapamoha, my pavinny byli b znachodzić nie 60%, a ŭsie 80% pazabiudžetnych srodkaŭ», — skazała jana.
Sioleta finansavaja situacyja ŭ krainie prymusiła raniejšych sponsaraŭ pierahledzieć pytańnie ab dapamozie kinafiestyvalu. Dyrekcyi «Listapada» užo admovili 65 biełaruskich kampanij i arhanizacyj, a źviartacca da mižnarodnych fondaŭ i zamiežnych kaleh, na dumku Krašeŭskaj, bieśpierśpiektyŭna.
Minski mižnarodny kinafiestyval «Listapad» — samy viadomy ŭ Biełarusi kinaforum — pravodzicca z 1994 hoda. Fiestyval zasnavany Ministerstvam kultury i Minharvykankamam pry sadziejańni Biełteleradyjokampanii, kinastudyi «Biełaruśfilm» i Biełaruskaha sajuza kiniematahrafistaŭ. Arhanizataram fiestyvalu tradycyjna vystupaje Centr vizualnych i vykanalnickich mastactvaŭ «ART Karparejšn».
Fiestyval dosyć vysoka kacirujecca ŭ asiarodździ kiniematahrafistaŭ, štohod załučajučy ŭsio novych i novych udzielnikaŭ z usiaho śvietu. U roznyja hady haściami «Listapada» stanavilisia polski režysior, scenaryst i pradziusar Kšyštaf Zanusi, francuzskaja scenarystka i režysior Kler Deni, viadomy sierbski režysior Emir Kusturyca, ukrainskaja aktrysa, scenaryst i režysior Kira Muratava, italjanskaja aktrysa Arneła Muci, rasijskija kinarežysiory Andrej Źviahincaŭ i Alaksandr Sakuraŭ, a taksama mnohija inšyja.
Mižnarodnaja fiederacyja asacyjacyj kinapradziusaraŭ akredytavała «Listapad» jak śpiecyjalizavany konkursny fiestyval filmaŭ krain Bałtyi, Centralnaj i Uschodniaj Jeŭropy, a taksama Centralnaj Azii.