Aficyjnaja delehacyja polskaha Aŭhustova prybyła ŭ Hrodna na bajdarkach
Burhamistr polskaha horada Aŭhustova Vojciech Valulik prybyŭ z aficyjnym vizitam u Hrodna na niezvyčajnym transparcie — bajdarcy.
Kiraŭnik horada pieraadoleŭ uvieś šlach pamiž haradami pa Aŭhustoŭskim kanale i Niomanie razam ź viadomymi polskimi spartoŭcami-vieślarami.
Jon padkreśliŭ, što adnoj z hałoŭnych metaŭ padarožža ličyć umacavańnie supracoŭnictva pamiž Aŭhustovam, Hrodnam i Druskininkajem, u jaki polskaja delehacyja adpravicca paśla naviedvańnia biełaruskaha horada.
«Nas padzialaje nievialikaja adlehłaść, nam jość, čym dapoŭnić adzin adnaho. Hrodna, naprykład, pryhožy histaryčny horad z bahataj historyjaj i tradycyjami, u nas — cudoŭnaja pryroda. My, viadoma, zacikaŭlenyja va ŭzajemavyhadnym supracoŭnictvie», — padkreśliŭ Vojciech Valulik. Jon adznačyŭ, što mahčymaść naviedvańnia zamiežnikami biełaruskaj častki Aŭhustoŭskaha kanała bieź viz adkryvaje jašče bolš šyrokija pierśpiektyvy dla realizacyi raznastajnych sumiesnych prajektaŭ u turystyčnaj śfiery, a ciapierašni vizit stanie jamu vydatnaj rekłamaj.
U sieradu, 7 vieraśnia, pamiž Hrodnam i Aŭhustovam, jak płanujecca, budzie padpisanaja damova ab supracoŭnictvie. Jak adznačałasia ŭ čas sustrečy, harady ŭžo rychtujuć sumiesny prajekt dla prahramy transhraničnaha supracoŭnictva. Jon praduhledžvaje budaŭnictva viełapiešachodnych mastoŭ praź Nioman u Hrodnie i raku Nietu ŭ Aŭhustovie.