U Baranavičach naziralniki za vybarami źviarnulisia ŭ Śledčy kamitet i prakuraturu
Naziralniki Siarhiej Hoŭša i Mikałaj Čarnavus-starejšy ŭpeŭnienyja, što źviestki ab kolkaści ludziej, jakija daterminova prahałasavali na adnym z učastkaŭ horada, zavyšanyja amal utraja.
Jak raspavioŭ Intex-press Siarhiej Hoŭša, naziralnik ad Biełaruskaha Chielsinskaha kamiteta, 10 vieraśnia jon źviarnuŭsia ŭ Śledčy kamitet z zajavaj ab tym, što na vybarčym učastku №8 (siaredniaja škoła №15) Baranavickaj-Uschodniaj akruhi №6 vyniki pieršych čatyroch dzion daterminovaha hałasavańnia pa dadzienych učastkovaj kamisii i naziralnikaŭ istotna adroźnivajucca.
— Zhodna z padlikam naziralnika, u pieršy dzień prahałasavali daterminova 30 čałaviek, u druhi — 44, u treci — 67, u čaćviorty - 72, usiaho — 213 čałaviek, — kaža Siarhiej Hoŭša. — Pavodle źviestak učastkovaj kamisii, za čatyry dni prahałasavaŭ 561 čałaviek, abo ŭ 2,6 raza bolš.
Mikałaj Čarnavus-starejšy, jaki naziraje za chadoj hałasavańnia na hetym učastku, kaža, što paviedamiŭ pra situacyju ŭ CVK i prakuraturu, a taksama naziralnikam ad ABSIE.