Naziralnik Łahviniec paskardziŭsia ŭ CVK u suviazi ź biaspłatnaj razdačaj pavietranych šarykaŭ na ŭčastku, dzie kamisiju ŭznačalvaje biznesmen Tapuzidzis
Naziralnik ruchu «Za Svabodu» Aleś Łahviniec nakiravaŭ u CVK skarhu ŭ suviazi z tym, što na ŭčastku dla hałasavańnia № 347 u Minsku dzieciam biaspłatna razdavali pavietranyja šaryki. Učastak znachodzicca ŭ siaredniaj škole № 199 Minska, vybarčuju kamisiju tut uznačalvaje viadomy biznesmen Pavieł Tapuzidzis, paviedamiŭ BiełaPAN Łahviniec.
U skarzie ŭ Centrvybarkam i na imia Tapuzidzisa palityk napisaŭ, što ličyć biaspłatnuju razdaču šarykaŭ «dzieciam baćkoŭ, jakija hałasujuć na ŭčastku № 347, cyničnaj sprobaj hulać na pačućciach dziaciej». Na jaho dumku, heta faktyčna źjaŭlajecca «podkupam i prymusam vybarščykaŭ da hałasavańnia ŭ ciapierašnich umovach Biełarusi, dzie jaŭka na vybarach ŭjaŭlajecca kirujučaj hrupoŭkaj jak niejki votum davieru ŭładam». Łahviniec zapatrabavaŭ nieadkładna spynić razdaču pavietranych šarykaŭ.
Z-za biaspłatnych padarunkaŭ, na jaho dumku, dzieci zavablivajuć na ŭčastki hałasavańnia ŭsich darosłych členaŭ siamji: «Ja sam bačyŭ, jak adno i toje ž dzicia spačatku pryjšoŭ z baćkami, a potym - z babulaj, heta značyć, heta ŭpłyvaje na jaŭku».
Mianie abvinavačvali ŭ tym, što ja razdavaŭ hazietu «Narodnaja vola», nibyta heta podkup vybarščykaŭ. Tady ŭ vypadku z šarykami heta taksama podkup, bo nichto nie admović dziciaci pryjści tudy, dzie hetamu dziciaci biaspłatna daduć pryjemny prezient «, — dadaŭ palityk.