Jarmošyna nazvała hetyja vybary samaj libieralnaj parłamienckaj kampanijaj za 20 hadoŭ
Staršynia Centrvybarkama Lidzija Jarmošyna nazvała ciapierašnija vybary samaj libieralnaj parłamienckaj kampanijaj za apošnija 20 hadoŭ. Pra heta jana zajaviła ŭ efiry telekanała «Biełaruś 1».
«Heta byli samyja libieralnyja vybary za apošnija 20 hadoŭ (ja maju na ŭvazie parłamienckija). Jany davali najbolš šyrokija mahčymaści dla samavyjaŭleńnia ŭsich kandydataŭ u deputaty», — miarkuje Lidzija Jarmošyna.
Adkazvajučy na pytańnie pra nibyta sumnuju kampaniju, kiraŭnik CVK zajaviła, što sumnymi vybary byli dla tych, chto nie chacieŭ ničoha bačyć. «Možna lažać na kanapie i kazać: zrabicie mnie choraša ci zrabicie mnie viesieła, - zaŭvažyła jana. - Viadoma, budzie sumna, kali vy sami nie cikaviciesia».
Pry hetym šmat chto z kandydataŭ nie skarystalisia svajoj mahčymaściu vystupić na telebačańni ź pieradvybarnaj prahramaj. Lidzija Jarmošyna nazvała heta bajaźlivaściu i zajaviła, što kali chto-niebudź z tych, chto admoviŭsia vystupić, usio ž trapić u parłamient, to jon pavinien pastupova pryvykać da kamiery i mikrafona i ŭmieć publična adstojvać svaju pazicyju.