Unikalny draŭlany lamus u Hrodnie dačakaŭsia restaŭracyi
Pra stvareńnie muzieja katalickaj dyjacezii ŭ draŭlanym lamusie na terytoryi byłoha bryhickaha manastyra havaryli jašče try hady tamu. Unikalny pomnik šmat hod stajaŭ zakinuty i źniščaŭsia. Tolki ciapier razmovy robiacca bolš realistyčnymi. Užo ŭ kastryčniku śpiecyjalisty, u tym liku zaprošanyja admysłoŭcy z Polščy, majuć pačać pracy pa restaŭracyi ŭnikalnaha budynka XVIII stahodździa, paviedamlaje «Tvoj styl».
Zaraz raspracoŭvajecca dakumientacyja na adnaŭlenčyja raboty. Jak i płanavałasia raniej, tut budzie muziej dyjacezii. Što tyčycca dazvołaŭ na pracy, to ŭsio ŭžo padrychtavana i ŭzhodniena ź Ministerstvam kultury.
«Pracy pačnucca prykładna praź miesiac. U hetym hodzie płanujem realizavać pieršuju stupień — zamianić padmurak, bo stary ŭžo całkam nie prydatny, — adznačyŭ ksiondz Alaksandr Sasnoŭski, jaki adkazvaje za restaŭracyju lamusa.
Taksama rabočyja ačyściać pamiaškańnie ŭsiaredzinie ad śmiećcia i lišnich elemientaŭ, jakija źjavilisia ŭ saviecki čas. Kali čas i finansy dazvolać, to adrazu paśla hetaha pačniecca zamiena draŭlanych kanstrukcyj, jakija prahnili — pieradusim elemientaŭ kala padmurka.
«Dla nas hałoŭnaja zadača — zachavać hety pomnik historyi. Pierad zimoj zojmiemsia poŭnaj kansiervacyjaj dachu, kab nie zalivała. Toje, što my zaraz majem kaštoŭnaha — na 100% zachavajem», — kaža ksiondz.
Haradzienski lamus — adzin z samych starych draŭlanych abjektaŭ u Biełarusi. Adnaŭleńnie jaho stanie važnaj častkaj maštabnaj šmathadovaj rekanstrukcyi ŭsiaho kompleksu bryhickaha manastyra, dzie ŭ savieckija hady raźmiaščałasia psichijatryčnaja balnica.
Paśla restaŭracyi ŭsiaho kompleksu terytoryja, dzie znachodzicca lamus, stanie adkrytaj dla ŭsich. U muziei vystaviać mnostva ekspanataŭ, jakija zaraz jość u katalickaj dyjacezii. Siarod ich — redkija asobniki knih i dakumienty XVII—XIX stahodździaŭ.
Haradzienski lamus — dvuchpaviarchovy dom z łodžyjaj na druhim paviersie i aračnymi halerejami na hałoŭnym fasadzie. Pabudavany ŭ tradycyjach biełaruskaha narodnaha dojlidstva, vykładzieny z masiŭnych brusoŭ, biez vykarystańnia klamaraŭ i mietaličnych krapiažoŭ. Vierahodna, pabudavany ŭ druhoj pałovie XVIII st., chacia i siońnia dzie-nidzie ŭ litaratury datujecca 1630 hodam.