Na padychodzie bieśpiłotnyja hruzavyja karabli: «Rołs-Rojs» staŭ inicyjataram Advanced Autonomous Waterborne Applications
Kanstruktary sudnaŭ, ich uładalniki i rehulujučyja arhanizacyi rychtujucca da taho, što marskija hruzavyja karabli ŭ chutkim časie buduć pracavać ź minimalnaj kolkaściu ekipaža albo navat stanuć bieśpiłotnymi.
Jak paviedamlaje Wall Street Journal, rynak marskich hruzapieravozak nieŭzabavie kardynalna źmienicca ŭ suviazi ź imklivym raźvićciom srodkaŭ suviazi i aŭtamatyzacyi. Marskija apieratary vierać, što aŭtamatyzacyja dazvolić nie tolki zekanomić na pracoŭnaj sile, ale i skaracić vydatki na paliva.
Brytanski mašynabudaŭničy hihant «Rołs-Rojs» staŭ inicyjataram stvareńnia prajekta Advanced Autonomous Waterborne Applications (AAWA), jaki abjadnoŭvaje vialikuju kolkaść kampanij i ŭniviersitetaŭ z usiaho śvietu. U miežach AAWA navukoŭcy i supracoŭniki marskich łahistyčnych kampanij sprabujuć pieranieści ŭžo raspracavanyja technałohii bieśpiłotnych aŭtamabilaŭ i samalotaŭ na marskija sudny.
Budučyja bieśpiłotnyja transpartnyja karabli buduć mieć takija ž pryłady, jak i siońniašnija drony: infračyrvonyja detektary, HD-kamiery i łaziernyja datčyki dla manitorynhu asiarodździa. Sabranyja dadzienyja buduć dasyłacca ŭ vialikija centry apracoŭki dadzienych, ź jakich śpiecyjalisty buduć sačyć za sudnami.
Vice-prezident «Rołs-Rojs» pa inavacyjach Oskar Levander adznačyŭ, što bieśpiłotnyja karabli skarociać transpartnyja vydatki na 22%. Takim čynam marski transpart, jaki na siońniašni dzień źjaŭlajecca samym tannym (paśla trubapravodnaha), stanie jašče tańniejšym.
Śpiecyjalisty zajmajucca nie tolki tearetyčnymi daśledavańniami mahčymaściaŭ bieśpiłotnych karabloŭ, ale i realizujuć niekatoryja idei ŭžo na praktycy. Kampanija Finferries absłuhoŭvaje ŭ Bałtyjskim mory parom Stella, jaki abstalavany roznymi ciepłavymi i łaziernymi datčykami. Navukoŭcy nazirajuć, nakolki takija sudny buduć prydatnymi dla vykarystańnia.
Čakajecca, što kamiercyjnyja karabli, jakija buduć dystancyjna kiravacca, źjaviacca da 2030 hoda, a całkam aŭtanomnyja — da 2035. Prahres u hetaj śfiery byŭ by niemahčymy bieź imklivaha raźvićcia technałohij suviazi. Da niadaŭniaha času stvareńnie padobnych bieśpiłotnych sistem abmiažoŭvałasia małoj prapusknoj zdolnaściu i vialikim koštam spadarožnikavych kanałaŭ suviazi. Ale novaje pakaleńnie spadarožnikaŭ suviazi dazvolić značna skaracić vydatki. Kampanija Inmarsat u hetym hodzie zapuściła servis Fleet Xpress, jaki dazvalaje dystancyjna nazirać za ruchavikom i inšymi funkcyjanalnymi častkami karabla i kiravać imi.
Rołs-Rojs, jaki bolš nie zajmajecca vytvorčaściu luksavych aŭtamabilaŭ, robić zaraz staŭku na takija «razumnyja» karabli. U suviazi sa značnym padzieńniem cen na naftu źmienšyŭsia popyt na marskija sudny. U «Rołs-Rojs» prodažy karabloŭ za apošnija 2 hady źnizilisia na 35%. Kiraŭnik marskoha adździeła «Rołs-Rojs» Mikael Makinien adznačyŭ, što, navat kali ceny na naftu i vyrastuć, rynak naftavych i hazavych sudnaŭ užo, chutčej za ŭsio, nikoli nie adnovicca da raniejšych abjomaŭ. Tamu całkam zrazumieła, čamu «Rołs-Rojs» robić staŭku na novuju i pierśpiektyŭnuju halinu karablebudavańnia.
Ale ažyćciavić aŭtamatyzacyju sudnachodstva nie tak prosta. I prablema tut nie tolki ŭ techničnych abmiežavańniach. Hałoŭny barjer — jurydyčny. Na siońniašni dzień nie zusim zrazumieła, jak rehulujučyja arhanizacyi buduć vyrašać pytańni piractva i biaśpieki bieśpiłotnych karabloŭ.
Mižnarodnaja marskaja arhanizacyja pry AAN, jak i «Mižnarodnaja kanviencyja pa achovie čałaviečaha žyćcia na mory», zabaraniaje absłuhoŭvańnie sudnaŭ biez ekipaža. Hetyja žorstkija praviły źjavilisia bolš za 100 hadoŭ tamu paśla krušeńnia «Tytanika» i tolki krychu redahavalisia ŭ 1974 hodzie. Vidavočna, što marskoje zakanadaŭstva źjaŭlajecca sastarełym i nie adpaviadaje ŭzroŭniu raźvićcia technałohij. Ekśpierty spadziajucca, što praviły marachodstva stanuć bolš hnutkimi.
Treba adznačyć, što raspracoŭkaj bieśpiłotnych sudnaŭ zajmajucca i vajskoŭcy. Sioleta viasnoj stała viadoma, što Pientahon pačaŭ testavyja vyprabavańni bieśpiłotnaha karabla «Marski palaŭničy». Nadvodny 40-mietrovy eśminiec pryznačany dla płavańnia na adlehłaść da niekalkich tysiač marskich mil.