GoPro vypuściła novuju ekšn-kamieru Hero 5 i ŭłasny dron Karma
Kampanija GoPro, viadomaja vodaniepranikalnymi ekšn-kamierami, vypuściła novuju liniejku kamier Hero 5 Black, Hero 5 Session i dron Karma ŭłasnaj raspracoŭki.
GoPro Hero 5 Black ciapier abstalavana 12-miehapiksielnaj kamieraj i 2-calevym sensarnym dysplejem. Źjaviłasia mahčymaść zapisu videa z razroźnieńniem 4K pry 30 kadrach u siekundu, zdymki ŭ RAW i kiravańnia hołasam. U kamiery ustalavany modul GPS, i biez dadatkovaha čachła jaje možna apuskać u vadu na hłybiniu dziesiać mietraŭ.
Raspracoŭščyki abiacajuć palepšany zapis huku, jaki dazvolić zapisvać u dobraj jakaści huk jak na kancercie, tak i pad vadoj. U płanie dyzajnu, akramia adsutnaści čachła i źjaŭleńnia dyspłeju, raspracoŭščyki prybrali adnu z knopak. Uklučeńnie, zapis i źmiena režymaŭ kirujecca adnoj knopkaj źvierchu kamiery.
Samym unikalnym novaŭviadzieńniem źjaŭlajecca hałasavoje kiravańnie. Kamiera budzie raspaznavać anhlijskuju, niamieckuju, francuzckuju, italjanskuju, ispanskuju, japonskuju i kitajskuju movy.
Taksama kamiera maje novuju technałohiju stabilizacyi videa. Prahramnaje zabieśpiačeńnie moža vyrablać bolš płaŭnaje videa zachopu, čym papiarednija madeli.
Košt GoPro Hero 5 Black — 430 jeŭra.
GoPro Hero 5 Session — bolš minijaciurny varyjant ekšn-kamiery GoPro. Jana maje kubičnuju formu i 10-miehapiksielny sensar. Mahčymaści zdymki videa amal anałahičnyja Hero5 Black. Prysutničaje kiravańnie hołasam i tradycyjnaja abarona ad vady. Vialikim adroźnieńniem ad svajho «vialikaha» anałahu źjaŭlajecca poŭna adsutnaść ekranaŭ u Hero 5 Session. Košt minijaciurnaj viersii — 330 jeŭra.
Bolš uvahi kampanija «GoPro sabrała vakoł siabie stvareńniem ułasnaha drona Karma. Pierš za ŭsio novy dron uražvaje svaim koštam — 870 jeŭra. Niekalki dzion tamu kampanija vypuściła videarolik, dzie raspaviała pra mahčymaści drona:
Dron ad GoPro moža lotać na vyšyni da 120 mietraŭ i adlehłaści kala 300 mietraŭ, adroźnivajecca kampaktnymi pamierami, a dziakujučy składanym kryłam jaho možna pakłaści ŭ śpiecyjalny zaplečnik. Kirujecca «Karma» z dapamohaj kantrolera, jaki nahadvaje hiejmpad. Akramia fizičnych knopak u jaho jość sensarny ekran: zadać kvadrakopteru maršrut možna nacisnuŭšy palcam na miesca pryznačeńnia na ekranie. Być u pavietry «Karma» moža 20 chvilin.
Dron źjavicca ŭ prodažy ŭ kancy kastryčnika.