Načalnik Hienštaba armii ZŠA: Budučaja vajna budzie «vielmi kryvavaj»
Amierykanskaja armija pavinna znoŭ być hatovaj da poŭnamaštabnych i ciažkich bajavych dziejańniaŭ suprać armij vysokatechnałahičnych dziaržaŭ, adznačyŭ hienierał Mark Mili, načalnik Hienštaba Suchaputnych vojskaŭ ZŠA ŭ pramovie ŭ aŭtorak.
Vysokapastaŭleny vajskoviec vystupaŭ na štohadovaj sustrečy Asacyjacyi ŭ padtrymku Suchaputnych vojskaŭ ZŠA.
«Stratehičnym płanam našaj dziaržavy kidajuć vyklik, a našy sajuzy vypraboŭvajucca na tryvałaść tak, jak hetaha nie adbyvałasia ŭžo šmat, šmat dziesiacihodździaŭ», — adznačyŭ hienierał.
facebook.com
«U toj čas, jak my kancentravalisia na vajnie z teraryzmam, inšyja krainy — Rasija, Iran, Kitaj, Paŭnočnaja Kareja — vučylisia na našym prykładzie. Jany vyvučali našu daktrynu, taktyku, ryštunak, arhanizacyju, mietady padrychtoŭki i kiraŭnictva… Siońnia jany chutka madernizujuć svaje armii ŭ spadziavańni pieramahčy nas u budučyni», — skazaŭ Mili.
«[Uzbrojeny] kanflikt pamiž dziaržavami amal harantavany na niejkim etapie», — dadaŭ jon.
Jon pracytavaŭ adnaho z upłyvovych rasijskich čynoŭnikaŭ, jaki publična zajaviŭ: «Sučasny suśvietny paradak pieražyvaje sutnasnyja pieramieny… Ciapier Rasija moža vieści zvyčajnuju vajnu ŭ Jeŭropie i pieramahčy».
Amierykanskija vojski pavinny chutka adaptavacca da źmieny situacyi paśla 15 hod vajny z terarystami i irehularnymi farmiravańniami ŭ Iraku i Afhanistanie, skazaŭ hienierał.
Budučaja vajna z technałahična prasunutym praciŭnikam budzie «vielmi kryvavaj, nie padobnaj da tych vojnaŭ, jakija viali Suchaputnyja vojski ZŠA z časoŭ Druhoj suśvietnaj».
Vojny buduć iści ŭ ščylna zasielenych haradach, na tle źmien u klimacie i bieśpierapynnych dyviersij u kibier- i infarmacyjnaj prastory, padčas imklivaha raźvićcia štučnaha intelektu, prahnazuje Mili.