U Aŭstralii kiciania vyratavała maci, jakaja zachrasła na miełkavodździ VIDEA
U Aŭstralii ekołahi stali śviedkami niezvyčajnaha zdareńnia — vyratavańnia darosłaj samki kita jaje ułasnym dzicianiom. Jak paviedamlaje BBC, incydent adbyŭsia ŭ minułuju sieradu ŭ rajonie vyspy Paŭnočny Stradbrok, prykładna ŭ 100 kiłamietrach ad Bryśbiena.
Supracoŭniki Słužby parkaŭ i dzikaj pryrody štata Kvinślend (QPWS) zaŭvažyli ŭ vadzie darosłuju samku harbataha kita, jakaja zachrasła na vodmieli. Vakoł jaje płavała kiciania, jakoje raz-poraz šturchała maci nosam, jak byccam sprabujučy dapamahčy joj vybracca ź miełkavodździa.
Piersanał słužby naziraŭ za namahańniami kitoŭ na praciahu prykładna 40 chvilin. Śpiecyjalisty raźličvali, što prylivy dapamohuć samcy vyzvalicca biez dapamohi ludziej. U advarotnym vypadku jany byli hatovyja ŭmiašacca i pravieści vyratavalnuju apieracyju. Na ščaście, heta nie spatrebiłasia.
«Samka zmahła vyzvalicca i spłyła razam ź dzicianiom», — raspavioŭ žurnalistam pradstaŭnik QPWS. Jon taksama adznačyŭ, što jana vyhladała «krychu stomlenaj i zasmučanaj».
BBC adznačaje, što kity časta źjaŭlajucca la ŭźbiarežža Kvinślenda ŭ hety čas hoda. Tut jany naradžajuć i vyroščvajuć dzicianiat, paśla čaho mihrujuć u antarktyčnyja vady.