Eks-kiraŭnik «Motavieła» paŭstaŭ pierad sudom paśla 16 miesiacaŭ SIZA
U sudzie Frunzienskaha rajona Minska siońnia, 21 kastryčnika, pačaŭsia sud nad byłym kiraŭnikom AAT «Motavieła» Alaksandram Muraŭjovym.
U sudzie Frunzienskaha rajona Minska pačaŭsia praces pa spravie biznesoŭca Alaksandra Muraŭjova, užo byłoha ŭładara «Motavieła», jaki «nie spraviŭsia» z pradpryjemstvam.
Jaho vinavaciać u machlarstvie, ździejśnienym arhanizavanaj hrupaj albo ŭ asabliva bujnym pamiery, kradziežy šlacham złoŭžyvańnia słužbovymi paŭnamoctvami arhanizavanaj hrupaj albo ŭ asabliva bujnym pamiery, uchileńni ad vypłaty padatkaŭ sa škodaj u asabliva bujnym pamiery, Akramia taho, Muraŭjoŭ prachodzić pa artykule za saŭdzieł jak pamahaty i arhanizatar.
Svoj jubilej biznesoviec sustreŭ za kratami — sioleta 11 vieraśnia Alaksandru Muraŭjovu spoŭniłasia 50 hadoŭ.
Akramia taho sudziać i jašče dvaich. Heta 56-hadovy Kazimir Maroz — eks-dyrektar «Motavieła». Jaho abvinavačvajuć u kradziežy šlacham złoŭžyvańnia słužbovymi paŭnamoctvaŭ arhanizavanaj hrupaj albo ŭ asabliva bujnym pamiery. I Taćciana Łukaviec, buchhałtarka, jakuju vinavaciać u pasobnictvie kradziažu.
Praŭda, pad vartaj ich nie trymajuć, vyzvalili pad padpisku.
Na samym pačatku pasiedžańnia Muraŭjoŭ paprasiŭ vyzvalić i jaho: admianić mieru strymańnia, začytaŭšy svajo chadajnictva. U im jon padkreśliŭ, što da suda pravioŭ za kratami amal 17 miesiacaŭ. A ŭ tym, kab sud vyśvietliŭ praŭdu, jon i sam zacikaŭleny, tamu chavacca nie źbirajecca. A pravavych padstavaŭ trymać jaho pad vartaj niama, zajaviŭ Muraŭjoŭ, bo złačynstva, u jakim jaho abvinavačvajuć, ekanamičnaje i pahrozy dla hramadstva jon nie pradstaŭlaje.
Prakuror, samo saboj, vystupiŭ suprać. Sudździa Julija Bliźniuk chadajnictva adchiliła — Muraŭjoŭ zastaŭsia pad vartaj.
Zatym ahučyli abvinavačvańni. Pa viersija prakuratury, Muraŭjoŭ vykarystoŭvaŭ srodki «Motavieła» na patreby inšych svaich kampanij, imitavaŭ, što abaviazki pa raźvićciu pradpryjemstva vykonvajucca, falsifikavaŭ spravazdačy ab vykanańni svaich abaviazkaŭ.
***
Biznesoviec Alaksandr Muraŭjoŭ, stvaralnik i kiraŭnik biełaruska-aŭstryjskaj kampanii ATEC Holding Gmbh, jakaja zajmałasia ŭ asnoŭnym škłom, nabyŭ «Motavieła» ŭ dziaržavy za 7 miljonaŭ dalaraŭ jašče ŭ 2007 hodzie. Jon pavinien byŭ «padniać» pradpryjemstva, zrabiŭšy jaho adnym ź lidaraŭ u halinie. Ale ž praz 7 hadoŭ pravierki pakazali, što «Motavieła» nie raźvivajecca, a pacichu hinie.
Uvohule, u 2014 hodzie prablemy ŭ Muraŭjova pačalisia pa ŭsich frantach. Zbankrutavali niekalki pradpryjemstvaŭ jaho šklanoha chołdynhu. A pravierka KDK pakazała, što na «Motavieła» spravy iduć zusim nie tak, jak płanavałasia: kolkaść rabotnikaŭ skaračajecca, ahučanych inviestycyj ad Muraŭjova zavod nie atrymaŭ, naadvarot, častku abstalavańnia biznesoviec pradaŭ, peŭnuju kolkaść pamiaškańniaŭ załažyŭ inšym kampanijam. Da taho ž, pa viersii KDK, srodki «Motavieła» vykarystoŭvalisia inšymi pradpryjemstvami Muraŭjova.
Alaksandra Muraŭjova aryštavali ŭ červieni 2015 hoda. Taksama zatrymali i jaho bratoŭ Siarhieja i Andreja Muraŭjovych i adnaho ź mieniedžaraŭ kampanii. Andrej Muraŭjoŭ siońnia na svabodzie, Siarhiej zatrymany.
Siońnia «Motavieła» kiruje Mikałaj Ładućka, były mer Minska.