U rasijskich VNU vymiarajuć «pratestny patencyjał» studentaŭ
24 kastryčnika hazieta «Kommiersant» napisała, što ŭ rasijskich VNU zajmajucca acenkaj «pratestnaha patencyjału» studentaŭ i vykładčykaŭ u intaresach ułady. Pra heta raspavioŭ namieśnik kiraŭnika Instytuta stratehičnych daśledavańniaŭ i prahnozaŭ pry RUDN Mikita Daniuk. Užo dniom jon zajaviŭ, što «Kommiersant» niapravilna zrazumieŭ jaho słovy. Paśla hetaha žurnalist vydańnia Alaksandr Čarnych vykłaŭ aŭdyjofajł z pramovaj Daniuka.
Mikita Daniuk raspavioŭ ab zamierach «pratestnaha patencyjału» na kanhresie prarektaraŭ pa vychavaŭčaj rabocie. Jon dadaŭ, što zajmajecca arhanizacyjaj sieryi navukova-aśvietnickich lekcyj «Scenaryi budučyni Rasii», pryśviečanych pytańniam «procidziejańnia destruktyŭnym palityčnym siłam». «Pa vynikach hetaha prajekta byli składzienyja daviedki dla słužbovaha karystańnia — u tym liku dla pradstaŭnikoŭ orhanaŭ dziaržaŭnaj ułady, a taksama peŭnych śpiecyjalizavanych struktur», — pryvodzić słovy Daniuka «Kommiersant».
Lekcyi-dyskusii pa prahramie «Scenary budučyni Rasiei» sapraŭdy prachodziać u roznych VNU krainy z 2015 hoda. Tak, u sakaviku 2015 hoda ŭ Maskoŭskim dziaržaŭnym budaŭničym univiersitecie adbyłasia adna z takich kanfierencyj. U traŭni 2015 hoda Daniuk i inšyja lektary, siarod jakich byli prafiesara RUDN, doktara palityčnych navuk, piśmieńniki i hramadskija dziejačy vystupali ŭ RDHU, MDU i MDIMA. Jany raskazvali pra pahrozy destabilizacyi situacyi ŭ Rasii i pra toje, što «maładyja ludzi paddajucca łžyvym kaštoŭnaściam i manipulacyjam». Studenty i vykładčyki RDHU pasprabavali sarvać hetuju lekcyju, kali mikrafon uziaŭ sustaršynia ruchu «Antymajdan» Mikałaj Starych.
Pa infarmacyi «Hazieta.ru», finansavańnie cykła lekcyj «Scenaryi budučyni Rasiei» prachodziła za dziaržaŭny košt. Prajekt jak minimum dva razy atrymlivaŭ hrošy z prezidenckaha hranta dla NKA: 4,95 miljona rubloŭ i 7 miljonaŭ rubloŭ.
Pres-sakratar prezidenta Rasii Dźmitryj Piaskoŭ skazaŭ, što ničoha nie viedaje pra pravierki VNU na «pratestny patencyjał». Piaskoŭ taksama zajaviŭ, što kali jany i byli, to Kramlom nie inicyjavalisia. Ničoha nie viedajuć ab inicyjatyvie Daniuka i ŭ RUDN. U VNU adznačyli, što jon vystupaŭ na kanhresie prarektaraŭ nie jak pradstaŭnik RUDN.
U druhoj pałovie dnia 24 kastryčnika Daniuk abvierh svaje słovy. Na zvanki «Mieduzy» Mikita Daniuk nie adkazvaŭ, ale ŭ intervju RIA «Novosti» zajaviŭ, što nijakich pravierak rasiejskich VNU na «pratestny patencyjał» niama. Jon raspavioŭ, što prajekt zajmajecca tolki navukova-aśvietnickaj dziejnaściu, jon «nakiravany na prafiłaktyku destruktyŭnych palittechnałohij u studenckim asiarodździ». Što tyčycca zamieraŭ «pratestnaha patencyjału», to Daniuk kaža, što padobnymi daśledavańniami zajmajucca zachodnija palittechnołahi, «jakija, na žal, sprabujuć nakalić sacyjalna-palityčnuju abstanoŭku ŭ Rasiei». U adkaz na heta žurnalist «Kommiersanta» Alaksandr Čarnych vykłaŭ zapis vystupu Daniuka, paśla jakoha nie zastajecca sumnievaŭ, što na kanhresie jon pramoviŭ mienavita tyja słovy, jakija byli zacytavanyja.