Pieršyja zamiežnyja turysty ŭjechali bieź viz u park «Aŭhustoŭski kanał»
Pieršymi turystami, jakija ŭjechali bieź viz na terytoryju parku «Aŭhustoŭski kanał», stali pradstaŭniki polskaj delehacyi na čale z maršałkam Padlaskaha vajavodstva Ježy Laščynskim.
Maršałak Ježy Laščynski pierasiok biełaruska-polskuju hranicu ŭ punkcie propusku «Lasnaja-Rudaŭka». Sustrakaŭ polskuju delehacyju staršynia Hrodzienskaha abłvykankama Uładzimir Kraŭcoŭ.
«Heta značnaja padzieja nie tolki dla našaha rehijona, ale i dla krainy, a taksama dla našych susiedziaŭ. U nas dobryja kantakty z Padlaskim vajavodstvam, mahčymaść dla našych susiedziaŭ naviedvać Hrodna i Hrodzienski rajon bieź viz, upeŭnieny, daść šturšok da dalejšaha ŭmacavańnia kulturnych, turystyčnych i ekanamičnych kantaktaŭ», - skazaŭ Uładzimir Kraŭcoŭ. Jon taksama padkreśliŭ, što i hramadzianie inšych krain prajaŭlajuć cikavaść da novaj mahčymaści, pakidajuć zajaŭki ŭ turfirm i na śpiecyjalizavanym sajcie.
Jak adznačyŭ Ježy Laščynski, «pieršapačatkovyja ŭražańni ad novaha režymu stanoŭčyja». Pavodle jaho słoŭ, ciapier šmat robicca dla taho, kab Aŭhustoŭski kanał byŭ cełasnym abjektam, dastupnym na ŭsim praciahu, i takoje rašeńnie - važny krok na šlachu da hetaha.
Polskaja delehacyja, pieršyja biaźvizavyja turysty, aznajomicca z patencyjałam biełaruskaj častki Aŭhustoŭskaha kanała. Taksama ŭ prahramie naviedvańnie punkta propusku «Safijova-Lipčany» na biełaruska-polskaj hranicy, sustreča ŭ Hrodzienskim abłvykankamie. Akramia taho, u Hrodnie budzie adkryty turyscka-infarmacyjny centr Padlaskaha vajavodstva, anałahičny abjekt, pryśviečany horadu Hrodna, pačnie rabotu ŭ Biełastoku.
Z 26 kastryčnika zamiežnyja turysty mohuć pryjazdžać u śpiecyjalny turyscka-rekreacyjny park «Aŭhustoŭski kanał» bieź vizy. U tak zvanuju biaźvizavuju zonu ŭvajšli taksama Hrodna i častka Hrodzienskaha rajona. Dla naviedvańnia parku inšaziemcu nieabchodna mieć z saboj pašpart (abo inšy dakumient dla vyjezdu za hranicu) i dakumient, jaki pradastaŭlaje prava na naviedvańnie Aŭhustoŭskaha kanała. Vydačaj i afarmleńniem takich dakumientaŭ zajmajucca turystyčnyja firmy. Zapoŭnić zajaŭku ŭ režymie anłajn možna na śpiecyjalizavanym sajcie grodnovisafree.by.
U turystaŭ pavinny być hrošy dla raschodaŭ na znachodžańnie ŭ Biełarusi i vyjezd z krainy. Na kožny dzień znachodžańnia treba mieć sumu ŭ valucie abo biełaruskich rublach, ekvivalentnuju nie mienš čym 2 bazavym vieličyniam (ciapier 1 BV - Br21). Biaźvizavy režym budzie dziejničać da 31 śniežnia 2017 hoda.