Artur Fińkievič: «Ułady nie zachacieli rabić ź mianie 21-hadovaha palitviaźnia»
Sud Pieršamajskaha rajonu prysudziŭ Arturu Fińkieviču 2 hady «chimii». Sudździa Viktoryja Zajcava rascaniła naniasieńnie hrafici «My chočam novaha» jak złosnaje chulihanstva (č.2 art. 339 KK). U toj ža čas z chłopca źniali abvinavačvańnie ŭ paškodžańni majomaści (č.3 art. 218), pavodle jakoha jamu pahražała ad 7 da 12 hadoŭ źniavoleńnia.
Vyzvaleńnie.
Fota
Sud Pieršamajskaha rajonu prysudziŭ Arturu Fińkieviču 2 hady «chimii». Sudździa Viktoryja Zajcava rascaniła naniasieńnie hrafici «My chočam novaha» jak złosnaje chulihanstva (č.2 art. 339 KK). U toj ža čas z chłopca źniali abvinavačvańnie ŭ paškodžańni majomaści (č.3 art. 218), pavodle jakoha jamu pahražała ad 7 da 12 hadoŭ źniavoleńnia.
Z 31 studzienia A.Fińkievič znachodziŭsia ŭ SIZA, dzie adzin dzień jamu zaličvaŭsia za dva. Za čas źniavoleńnia ŭ śledčym izalatary chłopiec nia mieŭ parušeńniaŭ, tamu moža raźličvać na žnivieńskuju amnistyju. U takim razie na «chimii» jon prabudzie kala 5 miesiacaŭ. Da momantu, pakul Departament pa vykanańni prysudaŭ vyznačycca ź miescam adbyvańnia pakarańnia, Artur budzie znachodzicca pad padpiskaj pra niavyjezd.
Pa ahučvańni prysudu maładoha palitviaźnia sustrakali siabry i rodnyja, jakija praź pierapoŭnienaść zali nie patrapili ŭ sud. Spatkać jaho pryjšli i vyzvalenyja ŭčora moładzievyja aktyvisty, što adsiadzieli pa 5 sutak za akcyju salidarnaści z Arturam, a taksama Źmicier Kaśpiarovič. Artur, jak zaŭvažyli jaho siabry, zaŭvažna schudnieŭ. Na pytańni žurnalistaŭ adkazvaŭ pavoli, kazaŭ, što paśla kamery, dzie samym ciažkim była adsutnaść pavietra, jamu točycca hałava. U rukach chłopiec trymaŭ zimovuju kurtku.
Z prysudam Artur nie pahadziŭsia, ale i abskardžvać jaho nie źbirajecca, nia bačačy ŭ hetym metazhodnaści. Pryčynaj takoha «miakkaha» prysudu, uličvajučy pahrozu źniavoleńnia da 12 hadoŭ, ličyć niežadańniem uładaŭ hańbicca źniavoleńniem 21-hadovaha junaka. I dadaje: «Ja rychtavaŭsia da taho, što atrymaju sama mieniej 5 hod, adnak ułady vidavočna bajacca, bo adčuvajuć niezvarotnaść pieramienaŭ u krainie».
«Hałoŭnaje dla mianie ciapier – paśpieć pabačycca z usimi svaimi, padziakavać usim, chto mianie padtrymlivaŭ ciaham źniavoleńnia», – dzielicca Artur planami na bližejšuju budučyniu. Niahledziačy na toje, što listy ŭ SIZA dachodzili ź vialikimi spaźnieńniami, praź niekalki tydniaŭ, jon u kursie ŭsich haračych navinaŭ. Pra toje, što atrymałasia, jon nie škaduje.
Fłešmob pierad Pieršamajskim sudom padčas razhladu spravy Fińkieviča.
Fota Andreja Lankieviča
A. Fińkievič siadaje ŭ aŭtazak paśla pieršaha dnia sudu.
Fota
❏
Sudy nad Fińkievičam i Sasimam
Artura Fińkieviča aryštavali 31 studzienia za naniasieńnie palityčnych hrafici. Ale vinavacili jaho nie ŭ palitycy, a ŭ naniasieńni škody hramadzkaj majomaści na amal 17 tys. dalaraŭ – «u asabliva bujnym pamiery». Chłopcu pahražała ad 7 da 12 hadoŭ źniavoleńnia. Dziaciuk trymaŭsia mužna. Jon pryznaŭ, što nanosiŭ nadpisy «Dostał» i «My chočam novaha» ŭ rajonie vulicaŭ Kazłova j Płatonava ŭ Miensku, ale patłumačyŭ heta žadańniem vykazać svaju palityčnuju pazycyju – što jon nia moh zrabić inšymi sposabami z pryčyny manapalizacyi ŚMI i parušeńnia inšych kanstytucyjnych svabodaŭ u krainie.
Pravaabaroncy nazyvali absurdnymi abvinavačvańni ŭ naniasieńni škody ŭ «asabliva bujnym pamiery» praź dziasiatak hrafici.
Sud pačaŭsia 4 traŭnia, ale byŭ adkładzieny, bo sudździa zapatrabavała ad pradstaŭnikoŭ kamunalnych słužbaŭ dokazaŭ taho, što škoda ad hrafici sapraŭdy nastolki vialikaja. Pazoŭnikaŭ z adździełu idealohii, jakija pryjšli, kab «vykazać mierkavańni» adnosna pavodzinaŭ Fińkieviča, jana absiekła: «Vašyja mierkavańni mohuć kaštavać jamu ad 7 da 12 hadoŭ turmy. Niasicie kaštarysy».
Padčas akcyi ŭ abaronu Fińkieviča 4 traŭnia byli zatrymanyja Kryścina Šacikava (50 b.v. štrafu), Alaksiej Kazulin, Jury Tałstoj, Alaksandar Reźnikaŭ, Andrej Ihnatčyk, Nadzieja Batura (usich pakarali aryštam na 5 sutak). Zatrymanych žurnalistak Tacianu Śnitko i Natallu Vałakidu vyzvalili paśla prahladu aperatyŭnych zdymak.
Sud nad Mikitam Sasimam u Baranavičach, raspačaty ŭ toj samy dzień, byŭ pieraniesieny na 11 traŭnia. Unačy pierad sudom u Baranavičach zatrymali abaroncaŭ namiotavaha miastečka Luboŭ Kačynskuju, Kaciarynu Dziatkoŭskuju i Nastaśsiu Koršun padčas rasklejki nalepak «Svabodu Sasimu»: usim dali štrafy pa 2 b.v.