U Mazyry dvoje dziaciej, ich maci i fielčar chutkaj dapamohi atrucilisia hazam
U Mazyrskuju haradskuju balnicu 13 listapada prykładna ŭ 17.00 pastupili čatyry pacyjenty z dyjahnazam «atručeńnie nieviadomym hazam». Siarod paciarpiełych — dvoje dziaciej, 6 i 14 hadoŭ, ich maci i fielčar chutkaj miedycynskaj dapamohi, jaki prybyŭ na vyklik i taksama adčuŭ hałavakružeńnie i niedamahańnie.
Jak paviedamiŭ hałoŭny doktar Mazyrskaj haradskoj balnicy Siarhiej Hankovič, ranicaj 14 listapada darosłych pieraviali ŭ terapieŭtyčnaje adździaleńnie, dziaciej — u dziciačuju balnicu, va ŭsich stan zdavalniajučy, ich žyćciu ničoha nie pahražaje. «U ich dyjahnaz — atručeńnie nieviadomym hazam, jakim mienavita — heta vyśvietlać śpiecyjalisty, sami pacyjenty kazali, što pach byŭ saładkavy, moža, heta i bytavy haz, a nie čadny», — zaŭvažyŭ hałoŭny doktar.
Pavodle jaho słoŭ, pieršapačatkova stała kiepska šaścihadovamu chłopčyku, paśla vykliku chutkaj ŭ kvatery adčuŭ niedamahańnie fielčar, zatym — 14-hadovaja dziaŭčynka i jaje maci. Usich zabrała ŭ špital druhaja mašyna chutkaj dapamohi.
U «Mazyrmižrajhazie» miarkujuć, što atručeńnie adbyłosia ad čadnaha hazu, jaki sabraŭsia ad taho, što ŭ domie sumieščanyja dymavy i vientylacyjny kanały. U arhanizacyi ŭdakładnili, što ŭ hetaj kvatery jość hazavaja kałonka, ale dym ad jaje sychodzić u patrebny kanał. A voś dym ad hazavaj kałonki, raźmieščanaj u druhoj kvatery, traplaŭ u vientylacyjny kanał, a praź jaho — u kvateru paciarpiełych. U «Mazyrmižrajhazie» ličać, što, mahčyma, parušeńnie było dapuščanaje pry budaŭnictvie doma. Ciapier na miescy zdareńnia pracujuć śpiecyjalisty, jakija praviarajuć usie kanały, kałonki i inšaje abstalavańnie.