Chto takija redneki, jakija abrali Trampa?
Paśla taho, jak u ZŠA byli abvieščanyja vyniki vybaraŭ, to možna było pačuć frazu kštałtu: «Redneki prahałasavali za Trampa». Chto ž takija hetyja zahadkavyja redneki, pra jakich tak mała čuli ŭ Biełarusi?
U stereatypnym ujaŭleńni redneki vyhladajuć prykładna tak.
Kali kazać litaralna, to słova «rednek» aznačaje «z čyrvonaj šyjaj». Heta značyć, ludzi, jakija ciažka pracavali ŭ poli, viali svaju fiermierskuju haspadarku. Ad pastajannaj pracy na soncy ŭ takich ludziej kłaŭsia pa ciele nieraŭnamierny zahar, ad hetaha jany i atrymali mianušku.
«Redneki» — heta časta abraźlivaja forma zvarotu da peŭnaj katehoryi hramadzian. Kali kazać vielmi hruba i pierakładać na našy realii, to heta niešta nakštałt «kałchoźnikaŭ». Maŭlaŭ, małaadukavanaje, ahresiŭnaje nasielnictva.
Najpierš «rednekami» nazyvali biełych mužčyn, što žyvuć u paŭdniovych i centralnych štatach ZŠA.
U masavaj kultury skłaŭsia ŭžo ceły płast kliše, źviazanych z rednekami — heta hrubyja, samazadavolenyja ludzi, jakija ličać siabie hałoŭnymi patryjotami krainy, nietalerantnyja da ŭsich mihrantaŭ, homaseksuałaŭ, čarnaskurych, intelihientaŭ. Stereatypny rednek jeździć na vialikim aŭtamabili, maje z saboj zaŭsiody strelbu i słuchaje muzyku kantry.
Adnak niekatoryja žychary paŭdniovych štataŭ z honaram pryniali hetuju nazvu. U Džordžyi navat pravodziacca «Alimpijady rednekaŭ» — heta takaja sproba samaironii z nazvy.
Padčas vybarčych kampanij 2000 i 2004 hoda apanienty Džordža Buša taksama abvinavačvali ŭ tym, što za jaho hałasujuć u asnoŭnym redneki. Toje samaje sioleta možna było pačuć i ŭ dačynieńni da Trampa.
Niekalki aniekdotaŭ pra rednekaŭ:
- U redneka jość dom na kołach i try aŭtamabili bieź ich.
- Numar telefona miascovaha taksidermista na chutkim nabory ŭ redneka.
- Rednek karystajecca jaršom dla ŭnitaza jak časałkaj dla śpiny.
- Zamiest narmalnaha buchła rednek pje samahonku i razbaŭleny bienzin.
- Na viasielnym zdymku ŭ zubach redneka zubačystka.
- Suma kalibraŭ zbroi redneka vyšejšaja za jaho IQ.