Rabotnikaŭ firmy ŭ Baranavičach na čas źmieny zamykali ŭ cechu
List ad 34 rabotnikaŭ firmy «Kipier Fiš» atrymali Hienieralnaja prakuratura, Kamitet dziaržkantrolu, Ministerstva sielskaj haspadarki i charčavańnia i Departamient finansavych rasśledavańniaŭ. Rabotniki pryvatnaha pradpryjemstva pa pierapracoŭcy morapraduktaŭ skardzilisia na nievynosnyja ŭmovy pracy, piša «Biełaruski čas».
Vytvorčy cech TAA «Kipier Fiš» znachodzicca ŭ Baranavičach. Kiraŭnictva firmy raźmiaščajecca ŭ Minsku.
Pa słovach rabotnikaŭ, pry pryjomie na pracu na ruki im nie vydavali pracoŭnuju damovu. Ludzi vymušanyja pracavać nie 8, a 12—15 hadzin u dzień. «Zvyšuročnyja pieratvarajuć u premijalnyja, jakija tut ža ŭtrymlivajucca za niejkija nadumanyja niastačy. Pracavać davodzicca ŭ irvanym humovym abutku (taki vydajuć), ludzi chvarejuć. Praces pierapracoŭki ryby nie miechanizavany, žančyny ciahajuć upakoŭki vahoj pa 45—50 kh. Bolš za toje, rabočych zapuskajuć u cech na pačatku źmieny, zatym dźviery zamykajuć na kluč i tolki naprykancy pracoŭnaha dnia admykajuć», — havorycca ŭ ich liście.
Staršynia Baranavickaha mižrajonnaha kamiteta Dziaržkantrolu Bresckaj vobłaści Aleh Daniłaŭ zajaviŭ, što pry praviercy nie ŭsie skarhi rabotnikaŭ paćvierdzilisia. Adnak nasamreč vyjaviłasia «pryhonnaje prava»: rabotnikaŭ sapraŭdy na čas pracoŭnaj źmieny zamykali ŭ cechu. Taksama byli vyjaŭlenyja prablemy z achovaj pracy, vykanańniem Pracoŭnaha kodeksu, zabieśpiačeńniem śpiecvopratkaj i śpiecabutkam.
Vyjaviła pravierka i parušeńni pry vypłacie zarobku. Kiraŭnictvu firmy prapanavali dobraachvotna viarnuć rabotnikam niezakonna ŭtrymanyja srodki.
Dziaržkantrol pryciahnuŭ kiraŭnikoŭ «Kipier Fiš» da administracyjnaj adkaznaści. Paviedamlajecca, što patrabavańni pa likvidacyi vyjaŭlenych niedachopaŭ firma ŭžo vykanała.