Zahadkavaja adstaŭka pieršaha namieśnika kiraŭnika MUS
17 listapada Alaksandr Łukašenka adpraviŭ u adstaŭku pieršaha namieśnika ministra ŭnutranych spravaŭ, načalnika kryminalnaj milicyi Valancina Michnieviča.
Valancin Michnievič. Fota sputnik.by.
U pryncypie, ničoha niezvyčajnaha ŭ hetaj adstaŭcy niama, bo ŭ vieraśni Michnievič byŭ abrany deputatam Pałaty pradstaŭnikoŭ. Hetak sama pasad byli pazbaŭlenyja ministr pracy i sacyjalnaj abarony Maryjanna Ščotkina, pasoł Biełarusi ŭ Aŭstryi Valeryi Varaniecki, kiraŭnik instytuta nacyjanalnaj biaśpieki Ivan Korž i niekatoryja inšyja.
Usie jany byli zvolnienyja pavodle punkta 4 častki druhoj artykuła 35 Pracoŭnaha kodeksa — «u suviazi ź pierachodam na vybarnuju pasadu». Valancina Michnieviča ž zvolnili zusim ź inšaj farmuloŭkaj — «u suviazi z chvarobaj».
Užo na pieršaj siesii Pałaty pradstaŭnikoŭ Valancin Michnievič byŭ abrany kiraŭnikom pastajannaj kamisii pa nacyjanalnaj biaśpiecy.
Ci nie pieraškodzić chvaroba pracy byłoha siłavika ŭ pałacie pradstaŭnikoŭ? Kiraŭnik pres-słužby Nacyjanalnaha schodu Kirył Prajanienkaŭ paviedamiŭ «NN», što nie maje nijakich źviestak adnosna stanu zdaroŭja spadara Michnieviča. «Nijakaj infarmacyi nie pastupała, što Michnievič nie zmoža vykonvać svaich abaviazkaŭ», — skazaŭ Prajanienkaŭ.
Valancin Michnievič naradziŭsia ŭ 1966 hodzie ŭ Minsku. Skončyŭ Taškienckuju vyšejšuju škołu MUS SSSR, hienierał-major milicyi. U orhanach MUS słužyŭ 27 hadoŭ. Uznačalvaŭ milicyju Hrodzienskaha abłvykankama. Apošnija 4 hady źjaŭlaŭsia pieršym namieśnikam ministra ŭnutranych spravaŭ.