U eks-dyrektara biełaruskamoŭnaj himnazii kanfiskujuć kvateru i mašyny
Sud Frunzienskaha rajona Minska vynies prysud u dačynieńni da Juryja Bandarenki, jaki na pasadzie dyrektara adnoj sa staličnych himnazij atrymaŭ chabar za spryjalnaje vyrašeńnie pytańnia ab zaličeńni dziciaci va ŭstanovu adukacyi.
Fota Darja Burakinaj, TUT.BY
Jon prysudžany da dvuch hadoŭ pazbaŭleńnia voli z adterminoŭkaj vykanańnia pakarańnia, pieradaje BIEŁTA z zały suda. U byłoha dyrektara budzie kanfiskavanaja majomaść — kvatera ŭ Minsku, dźvie mašyny i niekalki ziamielnych učastkaŭ. Akramia taho, sud zabaraniŭ Juryju Bandarenku ciaham 5 hadoŭ zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ.
Dziejańni Juryja Bandarenka kvalifikavanyja pa č.1 art.430 KK.
Prakuror adznačyŭ, što ŭ chodzie dopytaŭ padčas papiaredniaha rasśledavańnia mužčyna svaju pazicyju pa abvinavačvańni mianiaŭ. Pieršapačatkova ŭ pakazańniach paćviardžaŭ, što sapraŭdy prymaŭ hrašovyja srodki, ale z metaj nakiravać na patreby himnazii. Dalej, paśla pradjaŭleńnia abvinavačvańnia, jon tłumačyŭ, što hrošy prymaŭ u asabistych patrebach.
Juryj Bandarenka svaju vinu pryznaŭ całkam.
Jak paviedamlałasia, mužčyna abvinavačvajecca ŭ tym, što 18 žniŭnia ŭ kabiniecie za zaličeńnie dziciaci ŭ piaty kłas atrymaŭ ad jaho baćki $500.