Rasija pastaviła ŭ Biełaruś šeść najnoŭšych viertalotaŭ Mi-8MTV-5
28 listapada na aeradromie ŭ Mačuliščach asabistamu składu 50-j źmiešanaj avijabazy ŭručyli farmulary ad šaści najnoŭšych viertalotaŭ Mi-8MTV-5, paviedamlaje BiełaPAN.
Fota airwar.ru
Hetyja viertaloty źjaŭlajucca pieršaj partyjaj u ramkach kantraktu na pastaŭku dvanaccaci mašyn. Kantrakt byŭ padpisany z pradstaŭnikami chołdynhu «Viertaloty Rasii» padčas mižnarodnaha vajenna-techničnaha forumu «Armija-2015».
Jak paviedamiŭ na ŭračystaj cyrymonii ministr abarony Biełarusi hienierał-lejtenant Andrej Raŭkoŭ, jašče šeść viertalotaŭ pavinny być pastaŭlenyja ŭ Biełaruś u kancy maja — pačatku červienia 2017 hoda. Źviartajučy ŭvahu asabistaha składu avijabazy na novyja mašyny, Raŭkoŭ skazaŭ: «Na ich nam treba budzie vykonvać zadačy ŭ mirny čas i ŭ vypadku vajennaha času — na ich vajavać».
Vielmi važnaj padziejaj dla viertalotabudaŭnikoŭ Rasii nazvaŭ pastaŭku ŭ Biełaruś novaj vajennaj techniki hienieralny dyrektar chołdynhu «Viertaloty Rasii» Alaksandr Michiejeŭ. Pavodle jaho słoŭ, hetyja viertaloty na siońnia źjaŭlajucca najlepšymi ŭzorami viertalotnaj techniki, vyrablenaj na Kazanskim viertalotnym zavodzie. Michiejeŭ zapeŭniŭ Raŭkova, što kantraktnyja abaviazacielstvy rasijski bok vykanaje ŭ termin.
Novaja madyfikacyja viertalota u adroźnieńnie ad Mi-8MT abstalavanaja sučasnym kompleksam piłatažna-navihacyjnaha, radyjosuviaznoha i metavaha abstalavańnia. Mašyna pryznačana dla vyrašeńnia bajavych i transpartnych zadač. Pavialičany abjom hruzavoj kabiny, kolkaść pasadačnych miescaŭ pavialičyłasia na tracinu, što dazvalaje vykonvać desantavańnie da 35 desantnikaŭ i transparciroŭku supravadžeńnia miedpiersanału da 12 paranienych.
Viertalot abstalavany sistemaj biesparašutnaha desantavańnia, jakaja dazvalaje ažyćciaŭlać adnačasovy spusk čatyroch čałaviek. Jon taksama zdolny vykonvać zadačy dniom i nočču, na małych vyšyniach, u składanych mietearałahičnych umovach, a taksama pryziamlacca i ŭźlatać ź nieabstalavanych placovak.