«Bitva za ŭradžaj»: kukuruzu na Vilejščynie z-pad śniehu vyzvalali pa zahadzie?
Pravaabaroncy-viasnoŭcy paviedamlajuć, što da ich patrapiŭ dakumient, jaki padćvierdziŭ infarmacyju ab fakcie prymusovaj pracy na ŭborcy kukuruzy ŭ Vilejskim rajonie. Nahadvajem, na minułym tydni my pisali pra toje, jak ludzi źbirajuć pad śnieham uradžaj kukuruzy.
Ciapier stała viadoma, što jašče 14 listapada vykonvajučy abaviazki staršyni Vilejskaha rajvykankama I. Ševieleŭ padpisaŭ rasparadžeńnie za numaram 412a pad nazvaj «Ab akazańni dapamohi sielskahaspadarčym arhanizacyjam va ŭborcy pačatkaŭ kukuruzy». Hetym dakumientam pradpisvajecca «kiraŭnikam pradpryjemstvam i arhanizacyj rajona nakiravać z 15 listapada da poŭnaha zaviaršeńnia ŭborki pačatkaŭ kukuruzy rabotnikaŭ zhodna dadatku…»
Haradski aŭtapark pavinien byŭ zabiaśpiečyć vydzialeńnie 4 aŭtobusaŭ dla padvozki haražan na zaśniežanyja paletki.
Pryčym u dakumiencie, jaki pryvodzicca całkam, nie viadziecca havorki pra niejkuju apłatu takoj pracy. Akramia taho, rasparadžeńnie supiarečyć dziejučamu zakanadaŭstvu, u pryvatnaści — artykułu 20 Pracoŭnaha kodeksu, jaki zabaraniaje patrabavać ad pracaŭnika vykanańnie pracy, nie abumoŭlenaj pracoŭnaj damovaj. Z dakumienta vynikaje, što maje miesca sapraŭdnaja prymusovaja praca, jakaja nosić mabilizacyjny charaktar i prykryvaje zvyčajnuju biezhaspadarčaść čynoŭnikaŭ. A heta parušeńnie kanstytucyjnych pravoŭ hramadzian i mižnarodnych normaŭ, jakija zabaraniajuć prymusovuju pracu.
18 listapada pravaabaronca Valancin Stefanovič źviarnuŭsia ŭ prakuraturu i Minabłvykankam pa fakcie prymusovaj pracy na Vilejščynie, dzie ludziej sahnali źbirać kukuruzu.
U svaich zvarotach u prakuraturu Vilejskaha rajona i Minski abłasny vykanaŭčy kamitet Stefanovič stavić pad sumnieŭ, što hetaja praca była dobraachvotnaj. Jon padkreślivaje, što supracoŭniki roznych pradpryjemstvaŭ byli arhanizavana pryviezienyja na ŭborku kukuruzy na palach, heta padćviardžajecca u materyjale «NN» kamientarami pradstaŭnikoŭ adździeła ideałohii pradpryjemstva «Zienit-BiełOMA».
«Varta adznačyć, što ŭsie hetyja pracy pa ŭborcy ŭradžaja kukuruzy adbyvajucca ŭ pracoŭny čas, kali supracoŭniki pradpryjemstvaŭ pavinny znachodzicca na svaich niepasrednych pracoŭnych miescach i vykonvać tyja pracoŭnyja abaviazki, jakija praduhledžanyja ŭ zaklučanych pamiž imi i pradpryjemstvami pracoŭnymi damovami. U suviazi z hetym vyklikaje pytańni pravavy bok takoj pracy i jaje pravavoha rehulavańnia, apłaty i inš.», — piša pravaabaronca.
Stefanovič prasiŭ prakuraturu Vilejskaha rajonu i Minabłvykankam pravieści pravierku pa ŭkazanych faktach, a pry ŭstanaŭleńni parušeńniaŭ pracoŭnaha zakanadaŭstva z boku słužbovych asobaŭ pradpryjemstvaŭ i miascovych vykanaŭčych orhanaŭ ułady — pryciahnuć vinavatych da adkaznaści.
Ciapier zastajecca tolki dačakacca reakcyi ŭładaŭ na dziejańni čynoŭnikaŭ Vilejskaj viertykali.