«Kijeŭ — horad z vydatnymi ludźmi, ale vyhladaje jon žachliva»
Abmiarkoŭvajcie!
Možna skazać, što ja pakrychu pačynaju razumieć tych ukraincaŭ, jakim padabajecca tak zvany «biełaruski paradak».
Na fota vy možacie pabačyć typovyja krajavidy ŭkrainskich haradoŭ. Što samaje cikavaje, heta nie ŭskraina jakoha-niebudź pravincyjnaha horada. Heta kijeŭski Padoł — samaje serca ŭkrainskaj stalicy.
Kijeŭ — cudoŭny horad ź cikavymi miescami i vydatnymi ludźmi, ale vyhladaje jon prosta žachliva. I ja nie tolki pra brud, ale i pra niezrazumiełyja chaatyčnyja zabudovy, pabityja tratuary, kiepskuju transpartnuju sistemu (najhoršuju z tych, što ja bačyŭ u vialikich haradach) i inšyja rečy, jakija robiać hety horad nieprydatnym dla kamfortnaha žyćcia.
Kaniečnie, zaraz vy možacie ŭzhadać banalny i typovy arhumient: maŭlaŭ, va Ukrainie svaboda, a ŭ Biełarusi — dyktatura, tamu ŭ nas tak čysta i dahledžana. A ŭ tatalitarnym Pchieńjanie vy i niedakurka nie sustreniecie.
Ale ja kateharyčna nie prymaju padobny arhumient. Dla mianie paradak na vulicy i najaŭnaść svabod naŭprost nie źviazanyja pamiž saboj.
Brudna moža być i pry demakratyi, i pry dyktatury. I naadvarot, čysta i dahledžana moža być i pry demakratyi, i pry dyktatury. U Nieapali brudna, a ŭ Chielsinki — vielmi čysta!
Krytyki biełaruskaj ułady ździekliva kažuć, što ŭ Biełarusi «čyścieńka i paradačak», jak byccam heta niešta drennaje i niehatyŭnaje. U toj čas jak biełaruskija ideołahi lubiać paŭtarać: «A vy bačyli, jakoje biazładździe i verchał va Ukrainie? Vy takoj demakratyi chočacie?» Heta typovaja manipulacyja z abodvuch bakoŭ.
Nielha apraŭdvać žachlivy stan bolšaści ŭkrainskich haradoŭ najaŭnaściu svabody i demakratyi i tłumačyć dahledžanaść biełaruskich haradoŭ tolki dyktaturaj.
Bolš za toje, demakratyja daje bolš mahčymaściaŭ dla raźvićcia haradoŭ. Kali my pahladzim na šmatlikija rejtynhi haradoŭ pa jakaści žyćcia i dobraŭparadkavańni — vierchnija radki tam buduć zajmać harady ŭ demakratyčnych krainach. Pchieńjana vy tam dakładna nie sustreniecie.
Ni ŭ jakim razie nielha stavicca niehatyŭna da adnosnaj čyścini i dahledžanaści biełaruskich haradoŭ. U hetaj dobraŭparadkavanaści ničoha drennaha niama. Ale, moža, kali b Biełaruś stała bolš demakratyčnaj krainaj, jaje harady stali b jašče bolš čystymi, dahledžanymi i kamfartabielnymi?