Raspaŭsiudžanaść bakteryi chielikabaktar siarod žycharoŭ Biełarusi ŭdvaja bolšaja, čym u ES
Siarod žycharoŭ Biełarusi raspaŭsiudžanaść bakteryi chielikabaktar bolš čym udvaja pieravyšaje pakazčyki ŭ krainach Jeŭrasajuza, paviedamiła hałoŭny pazaštatny hastraenterołah Ministerstva achovy zdaroŭja Julija Harhun na pres-kanfierencyi ŭ Minsku 14 śniežnia.
Pavodle jaje słoŭ, kala 80% darosłaha nasielnictva Biełarusi zaražanyja chielikabaktaram, a ŭ krainach Zachodniaj Jeŭropy i ZŠA — 30—40%. Taki ž uzrovień zaražeńnia chielikabaktaram, jak u našaj krainie, nazirajecca va Ukrainie i ŭ Rasii.
«Raspaŭsiudžanaść infiekcyi vyznačajecca tym, nakolki raźvitaja kraina, nakolki dobryja sacyjalnyja i hihijeničnyja ŭmovy. U raźvitych krainach infikavanaść pačała źnižacca, kali prablema stała viadomaja. Naprykład, u Japonii pravodzicca dziaržaŭnaja palityka pa praviadzieńni skryninhu i lačeńnia chielikabaktaru, što razhladajecca jak asnoŭny mietad prafiłaktyki raku straŭnika. U vyniku infiekcyja dosyć chutka idzie na źmianšeńnie. Kali ž usio zaležyć tolki ad staŭleńnia pacyjenta i doktara, situacyja inšaja. Akramia taho, čym mienš nasielnictva infarmavana ab prablemie, tym jano mienš aktyŭna lečycca», — skazała Harhun.
Chielikabaktar moža vyklikać chraničny hastryt, jaki pierachodzić u jazvu straŭnika i dvanaccacipiersnaj kiški, a taksama pavyšaje ryzyku raźvićcia raku straŭnika. «Chielikabaktar razhladajecca jak dakładny vyznačany faktar raźvićcia raku straŭnika, a pa raspaŭsiudžanaści hetaha zachvorvańnia Biełaruś zajmaje adno ź pieršych miescaŭ u Jeŭropie», — adznačyła Harhun.
Ludzi, infikavanyja chielikabaktaram, časam nie adčuvajuć nijakich simptomaŭ, chvaroba praciakaje vielmi časta skrytna. Dla vyjaŭleńnia chielikabaktaru nieabchodna źviarnucca da doktara, jaki pryznačyć fibrahastraskapiju. U vypadku vyjaŭleńnia bakteryi nieabchodna prajści śpiecyjalnaje lačeńnie.
Jak adznačyła śpiecyjalist, jeŭrapiejskija rekamiendacyi lačeńnia chielikabaktaru hruntujucca na tym, što nieabchodnaść lačeńnia aceńvajecca indyvidualna ŭ kožnym kankretnym vypadku. Rekamiendacyi lačycca adrazu ŭsim členam siamji niama. Adnak čaściej za ŭsio, u vypadku kali ŭ kaho-niebudź ź siamji jość chielikabaktar, mohuć zarazicca i inšyja. Bolšaść dziaciej, u jakich vyjaŭlajecca infiekcyja, zarazilisia ad baćkoŭ. Nakont šlachoŭ zaražeńnia darosłych, skazała doktar, u Biełarusi daśledavańniaŭ nie pravodziłasia. Tamu jana nie zmahła skazać, jakim čynam žychary krainy zaražajucca chielikabaktaram.
U lubym vypadku kurs antybijotykaŭ pryznačajecca na asnovie dadzienych daśledavańniaŭ, stanu chvoraha. Kab paźbiehnuć pryvykańnia, nie pavinna być bieskantrolnaha prymianieńnia antybijotykaŭ, skazała Harhun.
«I pacyjenty, i daktary pavinny viedać, što, kali lačeńnie pravodziłasia, nieabchodna prajści test pa jaho vynikach. Inakš heta ŭsio hublaje sens», — dadała doktar.
Prakantralavać vyniki možna z dapamohaj vuhlarodnaha dychalnaha aparatnaha testa, jaki pravodzicca na śpiecyjalnym siertyfikavanym abstalavańni. Takija aparaty jość u bujnych balnicach i miedcentrach u kožnaj vobłaści. Testy čaściej za ŭsio robiać na kamiercyjnaj asnovie, bo mietodyka «davoli darahaja». Na biudžetnaj asnovie vykarystoŭvajecca fibrahastraskapija ź bijapsijaj. Doktar nie rekamiendavała vykarystoŭvać sierałahičny mietad dyjahnostyki dla kantrolu lačeńnia chielikabaktaru (analiz kryvi).
Kab nie infikavacca bakteryjaj chielikabaktar, nieabchodna vykonvać praviły asabistaj hihijeny, skazała doktar. Pa mahčymaści paźbiahać posudu, jaki moh być u niečym karystańni, nie ŭžyvać sumniŭnyja pradukty, jakija mohuć akazacca niadobrajakasnymi.